Poul Kallsberg fekk 71 minuttir á vøllinum, tá hann og liðfelagarnir í Hillerød seinnapartin spældu fyrsta dystin í ovara endaspælinum í næstbestu donsku fótbóltsdeildini.
Á útivølli leikti Hillerød javnt 1-1 móti Hvidovre, ið legði seg á odda í 67. minutti. Bert sjey minuttir seinni javnaði Mikkel Mouritz fyri útiliðið.
Hillerød er triðfremst í ovara endaspælinum við 38 stigum. Teir eru tvey stig aftanfyri Hvidovre, ið er næstfremst við 40 stigum. Lyngby er oddalið við 42 stigum.
Tvey tey fremstu liðini flyta upp í bestu donsku fótbóltsdeildina.
Í morgin klokkan 14 spælir liðið hjá Adrian R. Justinussen, AC Horsens móti Lyngby á heimavølli. Horsens hevur 30 stig á aftasta plássinum í ovara endaspælinum.
