Nú er hondbóltskappingin komin so langt, at so at siga øll liðini hava spælt einaferð móti øllum. Tað merkir eisini, at grundspælið er komið nøkulunda í helvt, og tað ber eisini til at siga, hvar tey ymsu liðini flóta. Og sigast kann, at tað higartil hava bæði verið negativ og positiv »yvirraskilsir« í kappingini.
Eitt tað mest negativa av hesum má vera, at StÍF ikki er komið í gongd enn, hvørki hjá monnum ella kvinnum. Menninir hava bert vunnið ein dyst av teimum fyrstu fýra, meðan kvinnurnar hava fingið 50 prosents úrtøku við at vinna tveir av fýra.
Í morgin skuldi kortini verið góður møguleiki hjá monnunum at fingið stig, tá teir á Skála taka ímóti Tjaldrinum, sum uttan iva fer at fáa tað trupult í 1. deild í ár. Hesin dysturin skuldi upprunaliga vera í høllini í Runavík, men av tí at sølustevna er har um vikuskiftið, er hann fluttur yvir um fjørðin og inn á Skála.
Kvinnurnar hjá StÍF hava eina á pappírinum eitt sindur torførari uppgávu. Tær skulu til Klaksvíkar at spæla móti Stjørnuni, sum eisini hevur havt misjøvn úrslit í ár. Stjørnan er í løtuni á triðja plássi, men hevur spælt tveir dystir fleiri enn strandakvinnur.
Meðan gongdin hjá StÍF liggur í negativa endanum, er tað meira positivt at síggja, hvussu Neistin er komin frá byrjan í ár. Serliga menninir hava tikið tey flestu á bóli og hava enn bert tapt ein dyst (tepri ósigurin móti Kyndli seinasta vikuskifti).
Nú skulu Neistamenn royna at reisa seg eftir tað vónbrotið, men mótstøðan er ikki hvør sum helst. Teir bláu skulu í dag til Vestmanna, har teir fyrr í ár hava vunnið móti KÍF, men nú eitur mótstøðuliðið VÍF. Føroyameistararnir vundu burtur úr Tjaldrinum í miðvikuni, men mótstøðan verður harðari hesaferð. Ein kann siga, at hetta verður dysturin, har Neistamenn skulu prógva, hvat teir veruliga vilja í 1. deild í ár. Í dag kunnu teir aftur fáa brúk fyri einum málmansavriki av tí slagnum, sum Bogi Henriksen vísti seinasta vikuskifti móti Kyndli.
Tað man vera lítil ivi um, hvat VÍF vil í ár, men teir hava ikki verið so sannførandi og hava longu tapt tvær ferðir. Sigurin á Tjaldrinum var væntaður, men vestmenningar hava ikki ráð til ein ósigur afturat.
VÍF kann taka
seg longur fram
Hjá kvinnunum vera tríggir dystir um vikuskiftið. Í dag spæla VÍF og Neistin í Vestmanna, og hetta kann gerast ein áhugaverdur dystur. Neistin er komin væl frá byrjanini, men tapti seinast móti Kyndli. Uppgávan í Vestmanna verður ikki løtt, men við einum sigri kunnu Neistakvinnur taka oddasessin frá Kyndli aftur. Men kvinnuhondbólturin í Vestmanna er í framgongd, og ambitiónirnar eru størri enn tær hava verið fyrr. Mikukvøldið vunnu VÍF-kvinnurnar trygt á GÍ/Tjaldrinum, men tað sást, at tað var ein dystur móti einum botnliði. VÍF kann við einum sigri yvirhála Neistan, og um tær vinna stórt (tað er tó ikki serliga sannlíkt), kunnu tær eisini fara framum Kyndil og upp á fremsta plássið.
Í morgin vera tveir dystir, ein í Klaksvík og ein í Vági. Í Klaksvík spæla Stjørnan og StÍF, og har kann alt henda. Sum gongdin er í løtuni, má Stjørnan sigast at vera lítil favorittur, men tær taptu á Skála fyrr í kappingini.
Í Vági verður botnuppgerð millum VB og GÍ/Tjaldrið. Avrikið hjá samansetta eysturoyarliðnum í Vestmanna mikukvøldið var lítið at reypa av, og dysturin í Vági verður neyvan lættari enn tann í Vestmanna, hóast VB enn ikki hevur fingið stig. Tað, at vágskvinnur framvegis ikki hava fingið stig, kann eisini gerast avgerandi munurin í dystinum, tí tær vita, at skulu tær vinna, verður møguleikin ikki nógv betri enn í morgin.
