Í flestu bygdum munnu vera seiðapláss, har menn og onkuntíð eisini kvinnur plagdu at standa á seiðabergi við vanligari bambustráðu og pilki.
Soleiðis er eisini í Nólsoy, har seiðaplássini eru fleiri. Undir Bátatúgvuni er fyrsta seiðaplássið, og siðan eru fleiri longur norður eftir fjøruni.
Eitt av hesum seiðaplássum - tað syðsta - er Húnaklettur. Her hevur verið eitt sindur keðiligt at staðið, tá vátt er í veðrinum. Tá kann kletturin gerast hálur.
Men, nú hava nólsoyingar, soleiðis sum viðheftu myndir vísa, lagt eina "brúgv" út á Húnaklett, soleiðis at maðurin, sum her stendur við tráðuni, stendur á sløttum.
Myndirnar, sum Pedda Hansen hevur tikið, vísa eisini, at fleiri mans vóru saman um at leggja jarnbrúnna út á Húnaklett.
Onkur viðmerkjari á facebooksíðuni - Nólsoy í myndum - heldur fyri, at nú er Húnaklettur vorðin "moderniseraður".
