Landskappingin er í summarfrí inntil á ólavsøku. Fimtanda umfar er ásett at vera á ólavsøku og dagarnar eftir ólavsøku.
Tað er greitt, at fleiri av dystunum í ólavsøkuumfarinum ikki fara at verða spældir ásetta dagin, men verða útsettir til tað ikki verður so nógv europeisk ferðsla í føroyskum fótbólti, sum tað verður tvær tær næstu vikurnar.
15. umfar sær sambært skipanini soleiðis út:
27. juli
AB – EB/Streymur
28. juli – ólavsøkuaftan
HB – Víkingur
29. juli – ólavsøkudag
B36 – Skála
30. juli
NSÍ – 07 Vestur
31. juli
KÍ – B68
Tað er greitt, at hvørgin av ólavsøkudystunum hjá feløgunum í Gundadali verður spældur á ólavsøku.
At Víkingur og HB ikki fara at spæla ólavsøkuaftan kemst av, at Víkingur fer at spæla á útivølli ímóti Dac 1904 Dunajska Streda úr Streda í Slovakia. Fyrri dysturin verður nú mikukvøldið á Tórsvølli, og seinni dysturin verður á útivølli á ólavsøku.
At B36 ikki fer at spæla ólavsøkudag ímóti Skála kemst av, at B36 fer at spæla ímóti Tre Fiori úr San Marino. Fyrri dysturin verður nú hóskvøldið á ovara vølli í Gundadali, og sjálvan ólavsøkuaftan fer B36 at spæla á útivølli í San Marino.
KÍ fer nú mikukvøldið klokkan 20 at spæla á útivølli í Montenegro ímóti meistaraliðnum Sutjeska, og mikudagin 27. juli klokkan 19 verður ólavsøkuhýrur í Klaksvík, tá ið Sutjeska verður gestur hjá føroysameistarunum, sum í gjárkvøldið í fyrsta dystinum í europeisku meistarakappingini nakrantíð á heimavøllinum vunnu 3-1 ímóti norska meistaraliðnum Bodø/Glimt.
