- Í kvøld skal vera liðugt við larmi í Vágsbotni!
Tað sigur Heðin Mortensen, borgarstjóri í Havn
Fyrr í dag staðfestu vit á in.fo í fyrr í dag, at tað elvdi til so nógvan larm, at grót verður brotið í sambandi við húsabygging í Vágsbotni, at Kaffivognurin mátti lata aftur.
Vit spurdu Heðin Mortensen, borgarstjóra, um tað er rímiligt, at vinnuvirki skulu noyðast at steingja av larmi frá byggivinnuni.
Tað heldur hann ikki og tá ið vit tosaðu við hann, segði hann, at hann fór at taka málið upp alt fyri eitt.
- Eg havi tikið málið upp og avtalan er, at alt sum eitur at bróta grót, og annað, sum larmar so illa, at tað ikki er verandi í Vágsbotni, skal vera liðugt í kvøld, sigur Heðin Mortensen.
- So eg bæði vóni og vænti, at í morgin árini skuldi aftur verið friður í Vágsbotni, og Kaffihúsið kann lata upp aftur, leggur hann afturat.
Men hann ger greitt, at hann fer at fylgja málinum upp.
Borgarstjórin sigur, at hann skilir tey í Kaffihúsinum væl, tí hetta hevur staðið upp á rættiliga leingi nú.
Byggingin heldur sjálvandi fram, men tað skal ikki vera til slíkan ampa, at vinnulívið skal noyðast at lata aftur fyri larmi.
- Er tað neyðugt at virksemi elvir til slíkan gang, at tað ikki er verandi, eiga vit at finna eina loysn og at skipa tað soleiðis, at øll kunnu vera her.
Sjúrður Holm, stjóri í Búsetur, sum ger arbeiðið, harmast um støðuna og hann skilir misnøgdina væl, tí hetta er ein fíggjarligur smeitur.
Men hann sigur, at tey fáa ikki gjørt annað enn at fáa arbeiðið liðugt sum skjótast, so at tað aftur verður friður.
Hann sigur, at tey sleppa ikki at spreingja fyri kaðalum, sum liggja beint við og tískil má grótið brótast.
Hann hevur roynt at finna onkra loysn á málinum, men tað hevur ikki borið til, tí tey mugu halda seg til tíðarætlanina fyri byggingina.
