Óttin hjá myndugleikunum er, at tað kann skapa ein flóðaldu, um ein partur av ísfjallinum brotnar
Eitt risa ísfjall er rikið á land uttan fyri bygdina Innaarsuit í Vesturgrønlandi. Teir 169 íbúgvarnir óttast, at ísfjallið kálvar – tað vil siga, at eitt stórt stykki skal brotna av.
– Fólkið í Innaarsuit er í hesum døgum ógvuliga óttafull um hetta stóra ísfjallið, sum er rikið á land við Innaarsuit, tí tað kann fáa ógvusligar avleiðingar, um tað kálvar, sigur bygdarráðsformaðurin, Karl Petersen, við Sermitsiaq.
Løgreglan heitir á fólk í tíðindaskrivi um at vera á varðhaldi. Óttast verður, at tað kann skapa eina flóðaldu, sigur Gideon Quist, politikommiserur.
Eisini hjá tilbúgvingini í Avannaata Kommunia óttast tey avleiðingarnar, um fjallið kálvar.
– Um fjallið kálvar, kann tað skapa eina flóðaldu, so tað ein álvarsom hóttan, sigur virkandi tilbúgvingarleiðari, Amos Petursson við Sermitsiaq.
Stykkið, sum kann detta á sjógv, er ein hóttan. Men ísfjøll koppa eisini ofta runt, tá tey kálva.
Tilbúgvingin er alla tíðina á varðhaldi, og um nøkur tekin eru til kálving, skulu íbúgvarnir í húsum á lægru økjunum í bygdini evakuerast.
Bygdarráðsformaðurin heldur tó ikki, at tað er nóg mikið. Hann vil hava, at ísfjallið skal flytast burtur, kanska við hjálp frá Arktisk Kommando.
– Eg vendi mær hervið til miðlarnar. Høvdu bara íbúgvar og vitjandi í Innaarsuit, sum eru óttafull, fingið ta hjálp, teimum tørvar, í hesi álvarsomu støðuni, sigur Karl Petersen.
17. juni í fjør varð bygdin Nuugaatsiaq við Uummannaq rakt av eini flóðaldu, sum kom orsakað av einum skriðulopi.
Fýra fólk doyðu, 11 vórðu særd, og fleiri hús vórðu skolað í havið. Bæði Nuugaatsiaq og grannabygdin Illorsuit eru manntómar í dag, tá myndugleikarnir óttast enn eitt skriðulop.
/ritzau/
