Tað, sum vendir niður, vendir upp, plagar at verða tikið til. Soleiðis var tað, tá ið gentubátarnir kappaðust á Havnarvág í dag.
Firvaldur av Tvøroyri hevur vunnið allar seks kappingarnar fyrr í summar. Í dag var starturin sera óheppin hjá annars óføru gentunum á Firvaldi, sum longu undan ólavsøku hevði tryggjað sær FM heitið. Firvaldur datt eina bátslongd aftur um fremstu bátarnar, og hóast Firvaldur royndi at svara aftur, so endaði hann á triðja plássi í tættari kapping við Fípuna Føgru, sum endaði á fjórða plássi.
Silja úr Fuglafirði og Jallurin hjá Róðrarfelagnum Knørri í Havn stríddust um sigurin á ólavsøku. Tað var sera tætt, og tað endaði við, at Jallurin var reingina undan Silju, tá ið bátarnir fóru um málið. Sigurin bar við sær, at Jallurin tók Fípuna Føgru í FM kappingini um silvurmerkini.
Í startspurtinum var tað Sílið hjá Havnar Róðrarfelag, sum legði bragdliga fyri, men Sílið endaði á fimta plássi.
1 Jallurin 05:11.18
2 Silja 05:12.16
3 Firvaldur 05:15.11
4 Fípan Fagra 05:16.05
5 Sílið 05:17.24
6 Blikur 05:28.16
7 Spógvin 05:29.18
8 Dúgvan 05:44.24
Endaliga støðan
1 Firvaldur 47
2 Jallurin 37
3 Fípan Fagra 36
4 Silja 34
5 Sílið 21
6 Spógvin 12
7 Blikur 8
8 Teistin 1
9 Dúgvan 0
