Sostætt er tað eitt tómt lyfti, sum Jenis av Rana sigur seg hava fingið frá sínum samgongufeløgum.
Sambært Jenisi av Rana er tað best, at hann verður verandi í samgonguni. Ávaringin frá honum um at rýma hevur hjálpt. Hann hevur fingið samgonguna meira sosiala, sigur hann.
Tað kann vera, at Jenis av Rana sjálvur trýr tí, hann sigur. Men tey flestu munnu síggja, at Jenis av Rana enn einaferð hevur bluffað, og tað gert tú ikki fleiri ferðir. Heldur ikki í politikki.
Tað var annars ikki við mýkindum, sum feðgarnir báðir, Jenis av Rana, formaður Miðfloksins, og sonurin, Hallur av Rana, formaður í ungmannafelagnum hjá Miðflokkinum, fóru við samgonguni. Sonurin rópti tað himmalrópandi arrogansu, meðan Jenis av Rana stóð fram sum tann góði maðurin, ið ikki hevði hjarta til politikkin hjá samgonguni.
Vit halda, at hetta spæl fyri gallarínum.
Spurningurin er, um samgongufelagarnir lurta eftir Jenisi. Tað nýtist teimum ikki, tí Miðflokkurin hevur sum so ongan týdning í samgonguni. Sjálvandi er tað stuttligari hjá løgmanni at hava eina breiðari samgongu, men politikkin hjá samgonguni ávirkar tað ikki, tað er sjón fyri søgn, tí endamálið hjá samgonguni er enn sum áður at taka frá teimum á niðastu rókunum, og geva teimum á ovastu rókum samfelagsins – fólki sum Jenis við fleiri feitum lønum og fleiri almennum tryggum pensjónum – pensjónum, sum ikki verða broyttar, ikki ein gong bleyta hjartað hjá Jenisi av Rana.
