Fyrrverandi amerikanski forsetin, Joe Biden, hevur fingið staðfest prostatakrabba. Hetta boðar skrivstova hansara frá, sambært Reuters.
Hetta vísir, at hóast talan er um eitt ágangandi slag av krabbameini, so er tað hormonviðkvæmt.
Sambært skrivstovuni ger hetta, at sjúkan kann handfarast effektivt.
Krabbamein hevur breitt seg til beinagrindina, og Biden gjøgnumgongur viðgerðarmøguleikar saman við familjuni og læknunum.
Prostata, eisini nevnd bløðruhálskirtil, situr beint undir bløðruni hjá monnum. Sambært krabbameinsfelagnum sæst hetta slagið av krabbameini ofta hjá eldri monnum, og sjúkan mennist typiskt seint.
82 ára gamli Biden var 46. forseti í USA frá januar 2021 til januar 2025. Hann var elsti amerikanski forsetin nakrantíð.
Tíðarskeiðið endaði, tá Donald Trump tók við sum forseti fyrr í ár.
Sambært AFP kemur sjúkuavgerðin, eftir at Biden fekk sjúkueyðkenni í urinleiðunum. Í síðstu viku varð hann kannaður fyri ein klump í prostata.
Biden stillaði upp aftur til forsetavalið í 2024, men gavst við valstríðnum umleið tríggjar mánaðir undan valinum, tá ivi varð reistur um hansara aldur og kognitivu førleikar.
Varaforsetin hjá honum, Kamala Harris, stillaði upp í staðin, og hon endaði við at tapa valið fyri Trump.
Á sosiala miðlinum X bjóðar Harris eggjan til Biden.
- Joe er ein stríðsmaður - og eg veit, at hann fer at møta hesi avbjóðing við somu styrki, mótstøðuføri og bjartskygni, sum altíð hava lýst lív hansara og leiðslu. Vit vóna ein fullan og skjótan bata, skrivar Harris.
Í síðstu viku kom ein upptøka av Biden frá 2023 fram, tá hann framvegis var forseti.
Her hevði hann eina skroypiliga rødd og hevði eftir øllum at døma ilt við at minnast árið, tá sonurin doyði og tá Trump fyrstu ferð varð valdur.
Sonur Biden, Beau Biden, doyði í 2015 av krabbameini í heilanum.
Joe Biden er demokratur og var varaforseti í USA undir Barack Obama frá 2009 til 2017.
/Ritzau/
