Jógvan Skorheim sat við valdi seinastu setu

Um lesarin skuldi ivast, so var tað Jógvan Skorheim, ið sat við valdi síðstu býráðssetu, og ikki undirritaði.

Eg havi fyrr talað at borgarstjóranum fyri at renna undan ábyrgd, og lat meg gera tað einaferð enn. Lat meg gera tað púra greitt, at ábyrgdarloysi hugar mær ikki! Tað eru teir politikarar, ið taka við ábyrgd og standa við sínar avgerðir, og so eru tað hinir, ið sveima millum ábyrgdarloysi og ryggleysar avgerðir. Borgarstjórin letur sínar veljarar - og føroyingum annars - vita, at fólkaflokkurin sat við valdi seinastu setu. Hetta ger borgarstjórin í einum samanhangi, har lesarin far ta fatan, at Jógvan Skorheim ikki var partur av hesum býráði. Tað, ið eisini undrar meg, er, at nú verður hallarmálið drigið inn í eina sakliga viðgerð av skattahækkingini í 2015 og gjøldum annars í kommununi.

Eg eri framvegis bilsin av, at borgarstjórin hevur reist seg soleiðis úr stólinum og flytur runt við lesarunum uttan mið og mál. Borgarstjórin er enntá so kreativur, at hann flytur ábyrgdina fyri lántøkum, ið verandi býráð hevur framt, til undanfarnu setu og gloymir, at hann sjálvur hevur sitið við ábyrgd í báðum førum.

Undanfarna býráð.

Eg fari ikki at seta meg í tokið hjá borgarstjóranum, ið eftir mínum tykki er avsporað. Eg vil tó viðmerkja, nú borgarstjórin ger nógv burtur úr leikluti fólkafloksins, at fíggjarligu fyritreytirnar, tá undanfarnu býráð tók við, á ongan hátt kunnu sammetast við mettíðirnar, sum vit í dag eru vitni til. Hetta nýtist mær ikki at skera út úr pappi fyri borgarstjóranum, ið sjálvur eigur leiklut í tí framgongd, kommunan hevur verið fyri. Eg vil tó fyri borgarunum vísa á, at tá ið undanfarna býráð tók við, var árliga inntøkan hjá kommununi knappar 132 mill., meðan inntøkan hjá kommununi fyri árið 2014 fer at tátta í 175 mill. Vit tosa um 40 - 45 mill. í meirinntøku. 

Hallarmálið.
Fyrst til hallarmálið. Hetta er eitt mál, ið er avgreitt, og tí harmar tað meg, at vit fara at róta í hesum. Men tá borgarstjórin enn einaferð hevur pyntað tølini, so má eg rætta hetta, tí eg meti ikki, at hetta sømir seg einum borgarstjóra. Høllin bleiv endaliga yvirtikin á býráðsfundi 29.01.13  (sí leinkju) http://www.klaksvik.fo/data/attachments/409BAE23-1B40-4641-BB4B-910DDC72821B/47177808-F3D5-4087-9EDD-8D316737814E.pdf - Eftir hesa viðgerð, vóru samráðingar við peningastovn um lántøku, og var hetta sjálvandi í verandi setu.

Kommunuskuldin.

Tá eg sigi, at lánini hjá Klaksvíkar kommunu ikki hava flutt seg, síðan vit høvdu borgarstjóraskiftið, so staðfestur borgarstjórin sjálvur við sínum tølum, at tað er rætt. At eg nú endurtaki meg sjálvan, er tí, at borgarstjórin enn einaferð er alment úti við upplýsingum til borgararnar, har hann ítøkiliga staðfestur - við pyntaðum tølum - at meirilutin fremur stórmál uttan lántøku. Lesarin kann sjálvur greina hesa talvu, tá ið tað nú endaliga er staðfest, at hallirnar vórðu yvirtiknar í hesari setuni. Eg endurgevi talvuna hjá borgarstjóranum.

Lántøkan áljóðandi 14,8 mill. fyri býráðsmál 2013/064 , ið bleiv samtykt á býráðsfundi 29.01.13 eigur at vera trekt frá kommunuskuldini 2012. Tí er tað sjálvandi rætt, tá eg vísi á, at kommunan ikki fremur mál uttan lántøku. Tað harmar meg, at eg verði noyddir at rætta hesa kreativu vending hjá borgarstjóranum, men vit lata tølini og fundarsamtyktirnar tala.

Eyðstein Poulsen

Býráðslimur, Klaksvíkar Kommuna