Tann 23. novembur í fjør varð skipað fyri almennum fundi í Virkinum á Sandi, har endamálið var, at øll sluppu at siga sína meining viðvíkjandi Teistanum og allar hansara manglar. Og hvussu Teistin kann tæna Sandoynni betur.
Avtalað varð á fundinum, at allar kommunur í Sandoynni skuldu velja eitt umboð, sum komu í eina nevnd, sum skal royna at arbeiða fyri, at Teistin verður betri gagnnýttur, enn hann er í dag. Sama nevnd skal hava tætt samstarv við Strandferðsluna.
Avtalað varð eisini á fundinum, at hendan nevndin skuldi hava sín fyrsta fund tann 15. desembur, har tey skuldu millum annað siga sandoyingum frá sínum fyrstu ætlanum. Men tann fundurin hevur ikki verið enn, tí Húsavíkar kommuna hevði ikki havt fund. Men í kvøld hevur Húsavíkar kommuna valt sítt umboð.
Tey, ið sita í
nevndini eru hesi:
• Sands kommuna:
Poul Klementsen
• Skopunar kommuna:
Bjørk Hentze (varafólk Heiðrún Hansen)
• Skálavíkar kommuna: Dánjal Jákup Jacobsen
• Húsavíkar kommuna: Bødvar Hjartvarsson
Í gjárkvøldið hevði Teistanevndin sín fyrsta fund, og hóast avbera gott veður, so leitaðu fólk sær eystur til Skálavíkar á fund.
Poul Klementsen, formaður í nevndini, legði fyribils niðurstøður fram. Millum annað eru ynski frammi viðvíkjandi ferðaseðlum. Sandoyingar vilja, at tað gerst møguligt at keypa ferðaseðlar við fartelefon ella internetinum. Eisini er ynski um, at ferðaseðlaprísurin fer niður, tí verandi ferðaseðlakostnaður er alt ov høgur, og kvøldtúrarnir hjá Teistanum kl 21 og 23 skulu halda fram.
Poul Klementsen segði fundarfólkinum frá, at nevndin hevur havt fund við Strandferðsluna, og stjórin, Bogi Mortensen, segði, at nøkur mál fingu teir loyst, og málini viðvíkjandi ferðaseðlakostnaði og kvøldtúrum fingu teir ikki loyst, tí tey eru politisk.
Síðan tók Jóhan Dahl orðið, og hann segði, at Teistin hevði verið trupul hetta seinasta tíðarskeiðið vegna brek, og hann segði seg skilja, at tað gongur út yvir arbeiði hjá fólki, flutning, vinnu o. a. Hann fegnast tó um, at loksins er pengingur fingin til vega til at umvæla Teistan fyri. Teistin skal til umvælingar í september mánaði, og 17 milliónir krónur eru játtaðar til umvælingar og fýra milliónir krónur eru játtaðar til sleipistøð.
Teistin verður úr sigling í níggju vikur, og hetta tíðarskeiðið røkir Ternan Sandoyarleiðina.
Jóhan Dahl lovaði fundarfólkinum, at hann vil gera alt, hann er mentur, fyri at finna eina loysn upp á skerjingar hjá Strandferðsluni, og at Teistin siglir seinastu túrarnar, ístaðin fyri at missa teir. Landstýrismaðurin greiddi eisini frá, at Strandferðslan er farin at arbeiða upp á eina skipan, har tað skal gerast møguligt at keypa ferðaseðlar við fartelefon og interneti. Viðvíkjandi ferðaseðlakostnaði, so er Jóhan Dahl fyri einari samhaldsfastari skipan, men tað er politisk ósemja enn um eina slíka skipan, segði landstýrismaðurin.
At enda fekk fundarfólkið at vita frá landstýrismanninum, hvussu nógv Teistin kostar. 15 milliónir krónur um árið eru settar av at reka Teistan fyri, men í 2011, kostaði Teistin 23 milliónir krónur og hevði inntøkur fyri 8,8 milliónir krónur.
Annars var fundurin góður og siðiligur og fundarfólkini vóru ófør at taka orðið og seta spurningar og koma við góðum hugskotum til bæði Teistanevnd og landstýrismannin í samferðslumálum, Jóhan Dahl.
