Tveir miðvikudystir í hondbóltskappingini eru á skránni í kvøld og í annaðkvøld. Í kvøld er ein mansdystur í Atlantic Airways-kappingini, sum verður spældur í Kollafirði klokkan 20, tá KÍF tekur ímóti Team Klaksvík.
KÍF er við heilt har frammi, hóast tað um vikuskiftið gjørdist til eitt tepurt tap fyri VÍF, sum eisini vil kappast um oddasessin, har Neistin nokk er liðið, hini bjóða av.
Mótstøðuliðið hjá kollfirðingum í kvøld, Team Klaksvík, er tað liðið, ið helst hevur verið orsøk til størst bilsni higartil, tí klaksvíkingarnir hava í sínum fyrstu dystum skavað sær trý stig saman. Sum tað higartil hevur sæð út, eru hetta bara tey fyrstu av mongum stigum í vetur.
Undan dystinum í kvøld er KÍF nummar tvey við fýra stigum og Team Klaksvík nummar fýra við trimum stigum.
Í annaðkvøld klokkan 19 er so ein kvinnudystur á skránni í KÍ-høllini í Klaksvík, har Stjørnan tekur ímóti StÍF. Stjørnan hevur tvey stig fyri tríggjar dystir og StÍF hevur bara spælt ein dyst, sum liðið tapti við 24 málum!
Stjørnan hevur mist nógv fólk undan hesum kappingarárinum, men hevur allíkavæl ein rímiligan hóp, sum í øllum førum ger, at heimaliðið má metast sum stórfavorittur, nú kvinnurnar av Strondum vitja.
