Sambært skránni var ætlanin, at fult umfar skuldi vera í 1. deild í kvøld. Seint í gjárkvøldið boðaði FSF frá, at fýra av teimum fimm dystunum eru avlýstir orsaka av koronuni.
Tí verður bara ein dystur í næstbestu deildini í kvøld. Tað er tann á Toftum. Talan er um grannauppgerð millum B68 og teir næstbestu hjá NSÍ, sum fara at vitja á Svangaskarði, har fyrsta bríksl verður klokkan 19.
FSF skrivar soleiðis á heimasíðu síni:
Kappingarnevndin í Fótbóltssambandi Føroya hevur avgjørt at útseta fýra dystir í 1. deild hjá monnum, sum eftir skránni skuldi spælast týsdagin 22. september.
Talan er um B36 – B71, HB – KÍ, 07 Vestur – AB og FC Hoyvík – Víkingur.
Orsøkin er koronatiltøkini, sum eru sett í verk á Glasir og í skúlanum á Fløtum. Kravt verður nevniliga, at allir næmingar, ið hava sína dagligu gongd á Glasir, og næmingarnir í skúlanum á Fløtum, sum halda til í miðhæddini í FSF-húsinum, skulu vísa eina negativa koronatest, sum er tikin í fyrsta lagi mikudagin 23. september, áðrenn teir sleppa at spæla dystir aftur.
Koronatiltøkini ávirka eisini kappingarnar hjá U15-gentum og U15-dreingjum. Dystirnir millum Skála og HB, og 07 Vestur og B36 í kappingini fyri U15 Gentur, sum skuldu verða týsdagin, eru fyribils útsettir. Tað sama er galdandi fyri dystirnar í U15 Dreingir millum HB b og NSÍ, og B36 b og B71, sum skuldu spælast mikudagin.
Fótbóltssamband Føroya boðar samstundis frá, at um fleiri lið eru ávirkað av nevndu støðu, verður heitt á feløgini um at boða FSF frá hesum skjótast tilber, skrivar FSF á heimasíðu síni.
