Kuno Fencker hevur sagt seg úr stjórnarflokkinum Siumut og fer í Naleraq, eins og unnusta hansara Aki-Matilda Høegh-Dam, sum er fólkatingslimur.
Tað skrivar hann í tíðindaskrivi sambært grønlendska KNR.
Á seinasta valinum í 2021 fekk hann 66 atkvøður og gjørdist annar varamaður, men fekk seinni møguleikan at koma inn á ting, Inatsisartut.
Kuno Fencker gjørdist av álvara kendur, tá hann ferðaðist til USA í kjalarvørrinum av, at Donald Trump varð innsettur sum forseti, fyri at hitta Trump-viðhaldsfólk, og gekk soleiðis ímóti flokslinjuni.
Her hitti hann ein lim í kongressini úr flokkinum hjá Donald Trump og tosaði um, hvussu bondini millum Grønland og USA kunnu styrkjast.
Kuno Fencker hitti Andy Ogles, sum hevur lagt fram lógaruppskot í kongressini, sum loyvir USA at keypa Grønland.
Sambært floksformanninum hjá Kuno Fencker, Erik Jensen, varð leiðslan í flokkinum ikki kunnað. Fencker ferðaðist sum ein "privatpersónur", sigur Erik Jensen.
/Ritzau/
