Men broytingarnar hjá samgonguni á pensjónsøkinum, sum komu í gildi á nýggjárinum, vórðu so mikið umfatandi, at tær tóku grundarlagið undan avgerðini hjá BankNordik at keypa tryggingarfelagið.
Bankin sigur í tíðindaskrivi, sum kom beint fyri evstamark í morgun, at keypsavtalan ásetti, at yvirtøkan skuldi fara fram við ársskiftið 2011/2012.
»Eftir at sølusáttmálin var undirskrivaður, broyttust viðurskiftini fyri lívstryggingarvirksemi seg heilt nógv, og førdi hetta við sær, at partarnir fyri nýggjár avráddu at útseta endaligu søluna til 1. juli 2012. Ímeðan skuldu allir sáttmálapartarnir við nýggju avbjóðingunum finna fram til semju um leist fyri søluna og framhaldandi lønandi rakstur av felagnum, herundir minking og avmarking av landskassaveðhaldinum fyri tryggingar, teknaðar fyri 1. januar 2000«.
Sambært Vinnumálaráðnum er orsøkin til, at handilin bleiv av ongum, fyrst broyting í langari rentu, herdar solvensreglur – skapt av fíggjarkreppu og sum orsøk nummar trý nevndir Vinnumálaráðið skatting av pensjónum við inngjald heldur enn útgjald.
– Men orsøkin er eyðsýnt. Landsstýrið hevur enn einaferð spent bein fyri eini privatisering – hesaferð við at gera umstøðurnar hjá einum tryggingarfelag so truplar, at eingin tímir at keypa tryggingarfelagið.