Liverpool tók av møguleikanum

Í gár var aftur Premier League fótbóltur á skránni, eftir tvær vikur við landsliðsfótbólti. Størsti skelkurin kom á Stamford Bridge, har West Bromwich undir leiðslu av Sam Allerdyce, vann heili 5-2 á Chelsea. Liverpool takkaði fyri Champions League stríðnum, meðan Manchester City verður meistari.

Manchester City setti eina tjúkka strikuna undir, at felagið fer at vinna meistaraheitið, tá teir vunnu útidystin móti Leicester City, ið er á triðja plássi. Tað var tann so nógv skaddi vinstri bakkurin, Benjamin Mendy, sum legði gestirnar á odda. Gabriel Jesus setti punktum við máli til 2-0.

Fyrsti dysturin í gjár var á Stamford Bridge. Chelsea var stórfavorittur at vinna á West Bromwich, sum er í stórum niðurflytingarvanda. Tað var eisini Chelsea, sum kom á odda við máli frá Christian Pulisic, men so vendi alt á høvdið.

Fyrst fekk brasilski miverjin hjá Chelsea, Thiago Silva, sítt seinna gula kort, og í minuttunum fyri hálvleik skoraði WBA tvær ferðir. Í seinna hálvleiki øktu gestirnir til 4-1, áðrenn Mason Mount minkaði um munin. Big Sam kundi tó smílast, áðrenn dómarin bríkslaði av, tí Callum Robinson tyggjaði sigurin við máli til 5-2.

Hetta gav Liverpool ein møguleika at koma upp í Champions League stríðið aftur, og verandi meistararnir tóku av. Liverpool vann sannførandi 3-0 á útivølli móti Arsenal. Innskifti Diogo Jota skoraði tvær ferðir, meðan Mohamed Salah eisini fekk eitt. Hann er nú toppskjútti við 18 málum. Liverpool er nú tvey stig aftanfyri Chelsea, sum er á fjórða plássi.

Leeds United vann eisini 2-1 á Sheffield United. Leeds liggur mitt á stigatalvuni, meðan Sheffield United er niðast og flytur niður.