Fyrilestrarnir eru ætlaðir starvsfólki í ferðavinnuni, og endamálið er at geva veitarum íblástur til at menna fleiri burðardyggar loysnir innan matgerð.
Tiltakið "Ferðavinna og føroyskar matvørur" verður hósdagin 17. februar á Hotel Brandan frá klokkan 13-16.30.
Á skránni eru áhugaverdir fyrilestrar við eitt nú norðurlendskum gestarøðarum, sum greiða frá sínum royndum og servitan at brúka rávørur úr nærumhvørvinum og fyrimunirnar, sum hetta hevur við sær í mun til umhvørvi og góðsku.
- Vit fara at viðgera, hvussu ferðavinnan í Føroyum kann ganga undan í arbeiðnum at menna og gagnnýta føroyskar rávørur til gagns fyri okkum øll. Høvuðsdentur verður lagdur á tætta sambandið millum matframleiðslu og ferðavinnuna.
Nomið verður eisini við evnið í breiðari merking innan mentan, umhvørvi og búskap.
Fyrilestrahaldarar á tiltakinum á Hotel Brandan verða:
* Andreas Lindberg (Rekur svensku fyritøkuna Bondens Skafferi, bindilið millum framleiðarar, matstovur og matvøruhandlar).
* Sunniva Mortensen (Rekur heimasíðuna Matkovin.fo, talgilt sølutorg fyri staðbundnar føroyskar matvørur).
* Philip Hougesen (Samsøe Madsnedkeri, sum hevur bæði matstovu og vørur við denti á staðbundnum rávørum).
* Jóhanna á Tjaldrafløtti (EMBLA tilnevnd vegna Húsarhaldsskúla Føroya í 2022).
* Elisabeth Skarðhamar Olsen (Ph.d. lesandi, sum granskar staðbundna matbúskapin í Føroyum).
- Tiltakið er ókeypis, men neyðugt er við tilmelding á www.atgongumerki.fo, siga stigtakararnir.
##med2##
