19 ára gamli miðvallarin, Mattias Hellisdal og liðfelagarnir í Västerås SK hava vunnið næstbestu svensku fótbóltsdeildina.
Hin uppflytarin, Kalmar FF var frammanfyri Västerås undan seinasta leikumfarinum. Men Kalmar FF tapti á heimavølli 1-2 fyri Falkenberg FF, og so var dúkað hjá Västerås at taka av. Og tað gjørdu teir í stórum stíli. Á Hitachi Energy Arena vøllinum í Västerås vann heimaliðið stórsigur 4-1 á Varberg. Útiliðið var á odda 1-0 í steðginum. Men í seinna hálvleiki skoraði Västerås fýra ferðir, og loyvdi sær enntá at brenna eitt brotsspark.
Mattias var á vøllinum í 83 minuttir. Hetta er annar dysturin hann spælir við besta liðnum hjá Västerås hetta kappingarárið.
Västerås vann deildini við 65 stigum, meðan Kalmar FF er nummar tvey við 64 stigum. Örgryte endaði á triðja plássinum við 56 stigum, og skal spæla tveir upp- og niðurflytingardystir móti triðaftasta liðnum í bestu svensku fótbóltsdeildini um rættin at spæla í Allsvenskuni komandi kappingarár.
In.fo ynskir Mattiasi hjartaliga tillukku við at vera við til at vinna næstbestu svensku fótbóltsdeildina.
