Heini Olsen
Nú er so nógv skrivað og talað fyri ella ímóti sub-leirvíksum tunli, at fólk so smátt eru farin at vamlast við hetta óendaliga tjakevni, sum eftir mínari meting ikki er so torført at loysa.
Sjálvur átti eg helst eisini at tagt, hetta serliga tá eg í móðurlegg eri ættaður undan Ussala-Pæturi og sostatt á henda hátt kanska komi mær í strið við okkurt av skyldfólkunum á Húsamørk í Leirvík; men tað gerst so ikki við. Hinvegin harmar tað meg, um tey tvíhalda um okkurt, tey seinni noyðast iðra seg um.
Í útvarpstjakinum mikukvøldið 1. mars kom einki fram um kirkjutunnilin, sum eg nevni hann, nú so nógvir eru á lofti, annað enn, at bygdarráðið var samt um, at har skuldi leiðin liggja alt gott um eina semju at siga; men annars talaði hesuferð enn meira fyri teirri ovaru loysnini, har vegurin er annar møguleikin og ein tunnil har uppi hitt uppskotið, um rindast vil eyka fyri tað loysnina.
Nú dámar mær í hesum ófriðatíðum best at skriva okkurt lættisoppasligt; men søgan um leirvíkarleiðina nærkast so mikið restini av umheiminum, at eg í fullum álvara seti fram hetta uppskot og grundgevi fyri tí:
Gerið fyrst vegin oman fyri bygdina.
Við hesum kunnu leirvíkingar sjálvir stýra framburðinum í Leirvíkar bygd og har á leið
Hann lýkur allar treytir og væl meira enn tað, tí umframt vanliga autoverju er eyka verja gjørd fyri larm, sum kanska als ikki er har, tí ljóð fer eins og hiti ikki so nógv niður eftir, sum upp í loft.
Vegurin gevur góða atgongd til stóra lendið omanfyri, har ítróttarvøllurin liggur, serliga um samstundis hampað verður um verandi atkomuvegin frá ætlaðu íbindingunum og niðaná tunnilstilfar til hetta endamál trýtur ikki.
Við hesum vegi bindur bygdarráðið um heilan fingur, tí nú hava teir vegin, sum undir øllum umstøðum einaferð skal gerast, eins og víst er í bygdarplaninum heilt afturi í 80-num, hetta um nakar framburður verður í Leirvík.
Tað verða bygdini dýr grundøki, um hesi eru tað, sum forðar fyri at leiða ferðsluna niðan um bygdina! Leirvíkar kommuna er vælsignað við størri byggivídd enn kanska nøkur onnur bygd í Føroyum.
Við hesum verðu eingin ferðsla gjøgnum bygdina, uttan so, at hin ferðandi í onkrum ørindum ynskir at snara frá í ferðslurundingunum hvørju megin bygdina, at vitja tað, sum har er, tað verið seg havnarlagið, vinnurekandi ella vinfólk.
Heldur brúka ætlaða vegaøkið har niðri til parkering til tey vitjandi, enn hetta fremmanda mitt gjøgnum bygdina.
Ella tunnil oman fyri bygdina
Sjálvur eri eg sannførdur um, at við omanfyri nevnda møguleika fyri vegi er ein tunnil óneyðugur; men fæst ikki semja um vegin, so er tunnilin omanfyri eftir míni meting so avgjørt frægari enn tað fremmandalikamið, sum talan er um at leggja niðanvert kirkjuna, og sum við tvinnum longum rampum ein í hvørjum enda. Í hvussu er ger kirkjutunnilin stóra kollveltandi broyting í friðarligu bygdarmyndina, og forðar í stóran mun fyri møguligum vinnuætlanum nærhendis havnarlagnum. Hvat heldur friðingarmyndugleikin um hetta?
Vísir vegurin omanfyri seg um hundrað ár ikki at nøkta tørvin, so liggur kirkjutunnilin ella eitt av hinum uppskotunum enn óroynt, hetta um ikki alt er útbygt.
Stóra økið Úti á Vík varð einki tosað um; men tað er kortini framtíð, sum hongur saman við planløgdu íbindingunum sunnan fyri bygdina.
Ein lítil viðmerking umVágatunnilin, tunnil undir Háls og veg oman fyri Sandavág og Miðvág
Ein yndislig kvinnurødd gramdi seg um, at Vágatunnilin ikki varð førdur heilt oman til Sandavágs, og um ferðsluna har og í Míðvági.
Til hetta kann eg siga, at millum tær 16 kannaðu tunnilsleiðirnar undir Vestmannasundi, var eisini ein, sum kom út við Smyrlagjógv oman fyri Sandavág; men varð hon so long, at fígging tá neyvan kundi fáast fyri tí loysnini. Eisini var hildið í so fall best vera við tvinnum tunlum, har annar er hin verandi Vágatunnilin og hin tunnilin frá norðanvert tunnilsmunnan vágamegin og í Smyrlagjógv. Tað prosjektið varð gjørt í 80-unum og hongur á goymslu.
Annað, sum hongur á goymslu, er ein vegur í framhaldi frá Smyrlagjógv og oman fyri Sandavágs og Miðvágs bygdir við íbinding til verandi landsveg við Leitisvatn. Hetta loysir spurningin um ferðslu gjøgnum bygd øki og er saman við Hálsatunlinum meira brúkbært fyri øll og munin bíligari enn tunnil av Oyrargjógv til flogvøllin, sum einans tænir flogferðsluni.
