Kaj Leo Holm Johannesen, løgmaður, hevur fingið mestu miðlaumrøðuna av valevnunum, nú tvær vikur eru eftir til løgtingsvalið.
Tað vísir uppteljing, sum Samfelagið – áhugafelagið hjá samfelagsfrøðingum – hevur gjørt.
Sonja Jógvansdóttir hevur fingið næstmestu umrøðuna í valstríðnum. Hon stillar upp fyri fyrstu ferð fyri Javnaðarflokkin.
Kanningin vísir, at samgongan og andstøðan hava fingið nærum eins nógva umrøðu í føroysku fjølmiðlunum. Størstu flokkarnir á tingi fáa eisini mest rúmd í miðlunum. Fyrstu tíðina undir valstríðnum hevði Sambandsflokkurin nógv mestu umrøðuna, men sum tað er fráliðið er umrøðan av Sambandsflokkinum vorðin minni.
Ymiskt er eisini, hvussu umrøðan av politisku flokkunum hevur verið í ymsu miðlunum. Framsókn hevur í mun til aðrar miðlar fingið nógv mestu umrøðuna í Sjónvarpinum – meira enn Javnaðarflokkurin og Fólkaflokkurin hava fingið.
Tað er SamFelagið, felagið hjá samfelagsfrøðingum, sum ger kanningina. Kanningin verður dagførd hvønn dag á www.samfelagid.fo/val fram til valið.
