Jóannes Hansen
Tær sjey kommunurnar í Suðuroy hava fyrstu ellivu mánaðirnar í ár tilsaman fingið 1.040.175 krónur minni inn í skatti, enn tær fingu sama tíðarskeið í fjør. Í fjør var samlaða skattainntøkan í Suðuroy fyrstu ellivu mánaðirnar 110.681.535 krónur, og í ár var hon 109.641.360 krónur.
Tríggjar kommunur í Suðuroy hava fingið meiri inn í skatti í ár, og fýra hava fingið minni inn í skatti í ár, enn tær fingu ellivu teir fyrstu mánaðirnar í fjør.
Størri inntøku hava Tvøroyrar, Fámjins og Sumbiar kommunur fingið. Minni inntøkur hava Hvalbiar, Hovs, Porkeris og Vágs kommunur fingið.
Skattaprosentið er tað sama í øllum kommununum tað sama, sum tað var í fjør, uttan í Hovi, har tað er eitt hálvt prosent høgri. Skattaprosentið í Hovi hækkaði á nýggjárinum úr 20,00 og upp í 20,50. Í hinum seks kommununum er skattaprosentið: Hvalba 20,00, Tvøroyri 23,50, Fámjin 19,00, Porkeri 21,00, Vágur 23,25 og Sumba 20,00.
Lutfalsliga er størsti vøksturin í Sumbiar kommunu. Har er fyribils kommunuskattainntøkan higartil í ár 1,55 prosent størri, enn hon var tað ellivu teir fyrstu mánaðirnar í fjør. Vøksturin svarar til 107.219 krónur. Í ár er inntøkan 7,019 milliónir krónur. Í fjør var hon 6,912 milliónir krónur.
Størsti vøksturin í krónum er í Tvøroyrar kommunu. Har komu 123.447 krónur meiri inn í kommunuskatti ellivu teir fyrstu mánaðirnar í ár, enn tað gjørdu í fjør. Tað svarar til ein vøkstur upp á 0,29 prosent. Inntøkan í ár var 43,034 milliónir. Í fjør var hon 42,910 milliónir krónur.
Fámjin er tann kommunan, sum eigur minstu skattainntøkuna í Suðuroy. Har vaks inntøkan fyrstu ellivu mánaðirnar í ár við 1,08 prosentum, tá ið sammett verður við í fjør. Inntøkan í ár var 22.105 krónur meiri. Í ár var hon 2,068 milliónir krónur, og í fjør var hon 2,046 milliónir krónur.
Størsta lutfalsliga afturgongdin var í Hovs kommunu. Har komu fyrstu ellivu mánaðirnar í ár 8,61 prosent minni inn í skatti enn í fjør. Tað svarar til 260.020 krónur. Í fjør komu 3,021 milliónir inn, og í ár var upphæddin 2,761 milliónir krónur.
Í krónum var afturgongdin størst í Hvalba. Har var fyribilsskattainntøkan fram til og við november í ár 711.862 krónur minni, enn hon var tað í fjør. Tað er ein afturgongd upp á -4,35 prosent. Í fjør var inntøkan 16,374 milliónir krónur, og í ár var hon 15,662 milliónir krónur.
Í Vági komu 257.859 krónur minni inn í fyribilsskatti fyrstu ellivu mánaðirnar í ár sammett við í fjør. Afturgongdin svarar til -0,81 prosent. Skatturin í fjør var 31,942 milliónir krónur, og í ár var hann 31,685 milliónir krónur.
Í Porkeri var skattainntøkan fram til og við november í ár 63.205 krónur minni enn sama tíðarskeið í fjør. Tað svarar til -0,85 prosent. Í fjør var inntøkan 7,476 milliónir krónur, og í ár var hon 7,413 milliónir krónur.
Í november hilnaðist inntøkansera væl hjá Porkeris, Hovs og Hvalbiar kommunum. Henda mánaðin var vøksturin hjá hesum kommununum sammett við november í fjør ávikavíst 15,47 prosent, 10,60 prosent og 10,06 prosent. Í krónum svarar hetta til 102.675 krónur í Porkeri, 26.682 krónur í Hovi og 141.085 krónur í Hvalba. Í Sumba var vøksturin í november 4,84 prosent ella 27.1323 krónur, og á Tvøroyri var vøksturin í november 95.100 krónur ella 2,41 prosent.
Í Fámjin og í Vági var skattainntøkan í november minni, enn hon var tað í sama mánað í fjør. Í Fámjin var minniinntøkan -14,25 prosent ella -33.695 krónur, og í Vági var hon –9,01 prosent ella -247.683 krónur.
