Mourinho fekk gult kort fyri at sneyta

Tað gongur einki hjá José Mourinho og Tottenham í løtuni. Liðið tapti í dag 1-0 móti Southampton. Góða gongdin hjá Leicester og Watford heldur fram, tó at liðini eru í hvør sínum enda.

Nýggi venjarin hjá Tottenham er sjáldan langt vekk frá yvirskriftunum. Soleiðis var eisini í dag, tá Southampton á heimavølli vann 1-0 á Tottenham. José Mourinho fór yvir til bonkin hjá Southampton og tóktist sneyta í papírini hjá venjaratoyminum hjá Southampton. Tað fekk hann gult kort fyri. 

Tað endaði við at Danny Ings og Southampton vunnu 1-0. Áleyparin skoraði einasta málið í dystinum. Miðlarnir samanbera málið við tiltikna málið hjá Paul Gascoigne fyri Onglandi móti Skotlandi í EM 1996.

 ##med2##

Southampton hevur, síðani liðið tapti 9-0 móti Leicester, vunnið 17 stig upp á 11 dystir, og tíggju av teimum upp á fýra teir seinastu dystirnar. Tottenham er á sætta plássi og verður helst uttan Harry Kane í eina tíð. Hann fór av vøllinum og tók seg til baklærið.

Leicester City vann 3-0 í Newcastle og er framvegis nummar tvey. Nógv bendir á, at Leicester í minsta lagi røkkur Champions League hetta kappingarárið, tí kappingarneytarnir missa stig. Í hinum endanum av stigatalvuni er Watford á veg fram. Liðið vann 2-1 á Wolverhampton í dag. Nú eru bara tvey stig upp til bjargingina.

Premier League 21. umfar:

Brighton – Chelsea 1-1

Burnley – Aston Villa 1-2

Newcastle – Leicester 0-3

Southampton – Tottenham 1-0

Watford – Wolverhampton 2-1

Manchester City – Everton (17.30)

Norwich – Crystal Palace (17.30)

West Ham – Bournemouth (17.30)

Arsenal – Manchester United (20.00)

Í morgin:

Liverpool – Sheffield United (20.00)