Føroyskir fjølmiðlar kappast bæði um redaktionelt innihald og inntøkur, men seinnu árini hava stórir altjóða miðlar bjóða av í kappingini um lýsingainntøkurnar í Føroyum.
- Í dag er framvegis kapping millum føroyskar miðlar, men hon kennist ikki so hørð, sum hon plagdi at vera. Nú er kappingin í eins stóran mun við Google og Facebook, sum bjóða føroyingum nýggjar lýsingamøguleikar, sigur Jonhard Hammer, stjóri í Miðlahúsinum.
Hann heldur tó, at miðlarnir í Miðalhúsinum kunnu standa seg í kappingini við stóru globalu fyritøkurnar.
- Miðlahúsið hevur føroyskar miðlar á føroyskum máli, sum fyrst og fremst fáast við føroysk viðurskifti, og tað verður tað eisini brúk fyri frameftir, hóast innihaldið á internetinum er óhugsandi stórt og fjølbroytt, sigur hann.
- Føroyska málið er eitt lítið mál, sum støðugt er undir trýsti frá øðrum málum, og alheimsgerðin hevur við sær, at børn og ung – og eisini vaksin – lesa, hoyra, tosa og skriva alt meira enskt og danskt. Millum annað tí er stórliga brúk fyri góðum føroyskum miðlum, sum geva tað føroyska tilboðið til føroyingar.
- Næsta málið hjá Miðlahúsinum verður at røkka útlendskum lýsingakrónum, so at renslið ikki bert er ein veg. Tað er ein framtíðar avbjóðing, sum vit hava tikið á okkum, sigur Jonhard Hammer, stjóri í Miðlahúsinum.
