Nær steðgar Bjarni Djurholm við sínum ágangi á føroyska mentan

Nú vil hann aftur eitt stig víðari móti fullkomnu liberaliseringini av rúsdrekkasølu. Hesaferð snýr tað seg um at broyta rúsdrekkalógina soleiðis, at til ber at sita á gongubreytunum og sutla øl í seg. Ófatiligt, at hesin maður ikki dugir at skilja, at vit ikki eru stødd í Danmark ella í øðrum líknandi londum, har øll mørk fyri frælsi hins einstaka eru strikað  sjálvandi við teirri avleiðing, at frælsið hjá teimum veikaru, harímillum barnanna, er sett til viks. Alt summarið hava fólk sutlað so nógv rúsdrekka í seg sum ongantíð áður, og allíkavæl heldur landsstýrismaðurin, at tað helst er møguligt at fáa føroyingar at drekka enn meiri. Vælsignaður Bjarni Djurholm, nær heldur tú uppat við hesum áganginum. Tú mást vera greiður yvir, at tað eru mong túsund menniskju her á landi, sum ikki ynskja hatta samfelagið, sum tú arbeiðir fyri. Tað eru nógvir føroyingar, sum ynskja eitt samfelag í siðprýði, har børnini og tey ungu verða vird, vard og sett í hásæti og teirra rættindi til gott umhvørvi verða tikin fram um rættindini hjá teimum vaksnu, sum absolutt ikki kunnu eta ein bita uttan øl og vín afturvið.