Fríggjakvøldið skifti Dagur & Vika orð við Bárð Enni, stjóra á Heilsufrøðiligu Starvsstovuni, sum eftir ferð í Ruslandi ásannaði, at russar eru alt annað enn lættir at dansa við, nú tað er ein veruleiki, at russiskir matvørumyndugleikar hava sett føroysk framleiðsluskip og virkir á reyða lista. At skip og virkir soleiðis eru endað á hesum lista, merkir, at tey ikki sleppa at útflyta sínar fiskavørur til Ruslands - fyribils.
Báður Enni og hansara fólk vóru ikki meira enn komin heim aftur úr Ruslandi, tá russar eisini settu Næraberg á reyða lista.
Í sendingini váttaði Hanus Hansen, reiðari, at Næraberg er raktur av russiska innflutningsbanninum, men hann vildi annars ikki úttala seg alment um russisku avgerðina. Eftir hvat skilst, hevur reiðarin í Klaksvík ringar vónir um, at málið við Nærabergi verður loyst í eini handavend.
Sambært Degi & Viku er orsøkin til russiska bannið móti Nærabergi, at eftirlitsfólk hava funnið tveir sápudunkar, eina brotna plátu og nøkur sonevnd munnstykki at spula við, sum eftirlitsfólkini ikki meta var í lagi.
