Nevndin skal eitt nú koma við tilmæli um, hvørjar tær kommunalu eindirnar skulu vera, hvussu hesar skulu skipast og um eina javningarskipan millum kommunurnar. Eisini skal nevndin mæla til eina raðfesting av uppgávu- og ábyrgdarbýti millum land og kommunur, og hvussu ein møgulig blokkstuðulsskipan skal skipast.
Arbeiðsuppgávurnar hjá nenvdini eru hesar:
Kommunueindir
Við støði í Løgtingslóg nr. 12 frá 22. februar 2007 um sjálvbodnar kommunusamanleggingar og kommunal samstørv í sambandi við lógarbundnar uppgávur, skal nevndin koma við tilmæli um, hvørjar tær kommunalu eindirnar skulu vera, og hvussu hesar skulu skipast.
Millumkommunal javningarskipan
Allar kommunur verða javntsettar mótvegis lóggávuni, t.e. at tær allar skulu loysa tær somu uppgávurnar. Við hesi javningarskipan skal miðast eftir, at allar kommunur eru fíggjarliga førar fyri at loysa tær kommunalu uppgávurnar, sjálvt um umstøðurnar hjá teimum ikki eru tær somu. Javningarskipanin skal tí fevna um javning av muni í inntøkugrundarlagi pr. borgara og í útreiðslutørvi pr. borgara.
Raðfesting av greiðum uppgávu- og ábyrgdarbýti millum land og kommunur
Allýsing verður gjørd av ábyrgdarøkjum, so sum eldraøkið, fólkaskúlin, vegakervið og aðrar uppgávur, sum kunnu flytast kommunum at umsita. Gerast skal ein ítøkilig raðfesting, ið ásetur hvørji økir, í hvørjari raðfylgju og nær hesi verða løgd til kommunurnar. Fyrsta stóra øki verður lagt til kommunurnar 1. januar 2011.
Blokkstuðul
Ætlanin er ikki at broyta skattaskipanina, og skal nevndin gera uppskot um, hvussu ein møgulig blokkstuðulsskipan skal skipast, sum tryggjar, at fígging er til tær uppgávur, sum verða fluttar til kommunurnar at umsita, tá tað ikki er gjørligt longur at broyta í býtinum millum lands- og kommunuskatt uttan at broyta skattaskipanina.
Eftirmeting
Gjørd verður ein eftirmeting av, hvussu tað hevur eydnast at lagt dagstovnaøkið og barnaforsorgarøkið til kommunurnar. Harumframt skal gerast ein fastur eftirmetingarleistur til tey øki, sum verða løgd til kommunurnar at umsita.
--
Kommunala umskipanarnevndin
Eyðbjørn Larsen, løgfrøðingur, Formaður
Ingibjørg Berg, stjórnmálafrøðingur
Jóan Petur Hentze, aðalskrivari, Kommunusamskipan Føroya
Eyðun Christiansen, ráðgevi, Føroya Kommunufelag
Doris Bjarkhamar, fulltrúi, Almannamálaráðið
Jenny Lydersen, undirvísingarleiðari, Mentamálaráðið
Sofus Debes Johannesen, fulltrúi, Fíggjarmálaráðið
Poula Árnadóttir Lervig, fulltrúi, Innlendismálaráðið
Hilmar Høgenni, deildarstjóri, Innlendismálaráðið
