Nýtt heimsmet í marathon

Sum so mangan áður í Berlin Marathon, so var dystur um at seta nýtt heimsmet á marathon-teininum, tá ið týski høvuðsstaðurin í dag legði asfalt undir kappingina hjá teimum gott 40.000 rennarunum.

Tað endaði við, at 33 ára gamli Eliud Kipchoge úr Kenja setti nýtt heimsmet í stórum stíli. Hann rann teinin við tíðini 02:01:39 og kutaði einki minni enn ein minutt og 18 sekund av tí nú gamla heimsmetinum. Hetta er størsta betringin av heimsmetinum í marathon í samfull 50 ár.

- Avrikið hjá Kipchoge í dag var eitt hitt besta atletiska avrikið í søguni. Hetta stendur eftir sum ein hin størsta framvísingin renningin nakrantíð hevur sæð, og mest sannlíkt fer hetta metið at vera standandi í nógv ár framyvir, skrivar FloTrack um avrikið.

Tað var landsmaður hansara, Dennis Kimetto, sum átti gamla heimsmetið (02:02:57). Hetta var frá 2014. Hetta var fjórðu ferð á rað, at ein úr Kenja setti heimsmet, og hetta var sjeyndu ferð á rað, at heimsmet varð sett í Berlin.

Heimsmetið hjá Kipchoge býtt upp í 5km: