Norska kringvarpið NRK veit at siga, at norski innflutningurin av vørum úr Russlandi vaks við 16 prosentum árini 2024 til 2025.
Hetta vísa tøl hjá SSB (Statistisk Sentralbyrå), sum er óheftur hagtalsstovnur í Noregi.
Hetta er fyrstu ferð, síðan Russland leyp á Ukraina fyri sløkum fýra árum síðan, at innflutningurin úr Russlandi er vaksin.
Innflutningsvirðið av vørum úr Russlandi í 2025 var á 381 norskar milliónir, sum svarar til 0,3 prosent av samlaða norska innflutninginum.
381 norskar milliónir eru umleið 245 milliónir í okkara peningi.
NRK veit at siga, at í 2024 var innflutningurin úr Russlandi 0,2 prosent.
Hyggja vit eftir, hvør innflutningurin var fyri russisku innrásina í Ukraina, so var hann í 2021 2,6 prosent av samlaða norska innflutninginum.
