Í vikuni sum fór kom stóra hagtalssíðan, Instat Scout – ið er ein heimasíða, ið skrásetur alt data í fótbólti, út við rúgvumiklum samandrátti frá Effo-deildini í 2017.
Í samandráttinum, sum er 32 síður til longdar, eru fleiri áhugaverdar talvur. Ein av teimum er, hvussu býtið hevur verið í dystinum, har liðini hava havt bóltin. Har sæst, at NSÍ í miðal hevði bóltin mest í Effo-deildini í 2017.
Í miðal hevði NSÍ eina aktiva spælitíð við bóltinum á liðnum í 32,45 minuttir í hvørjum dysti. Teimum á baki kom B36 við einum miðal tali á 31,57 minuttir í hvørjum dysti. Sum heild sæst eitt mynstur í talvuni, at liðini, ið endaðu í ovaru hálvu av deildini liggja væl omanfyri liðini, ið endaðu í botninum yvir at hava bóltin.
Tó er tað merkisvert, at føroyameistararnir úr Víkingi, liggja í niðaru hálvu yvir at hava havt bóltin í 2017. Í miðal hevði Víkingur bóltin aktivt í spæl 25,25 minuttir í hvørjum dysti í Effo-deildini. Niðast á listanum liggur nýggja felagsliðið í Suðuroynni, sum í miðal hevði bóltin 22,15 minuttir í hvørjum dysti.
Samlaða yvirlitið yvir at hava bóltin sær soleiðis út:
1. NSÍ 32,45 minuttir í miðal hvønn dyst (58% possesion)
2. B36 31,57 minuttir í miðal hvønn dyst (57% possesion)
3. HB 30,49 minuttir í miðal hvønn dyst (55% possesion)
4. KÍ 27,31 minuttir í miðal hvønn dyst (53% possesion)
5. ÍF 26,38 minuttir í miðal hvønn dyst (49% possesion)
6. Víkingur 25,25 minuttir í miðal hvønn dyst (48% possesion)
7. Skála 24,29 minutir í miðal hvønn dyst (44% possesion)
8. EB/Streymur 24,18 minuttir í miðal hvønn dyst (44% possesion)
9. 07 Vestur 23,49 minuttir í miðal hvønn dyst (44% possesion)
10. TB/FCS/Royn 22,15 minuttir í miðal hvønn dyst (45% possesion)
