Tveir av fremstu USA-serfrøðingunum í danska ríkinum, Clement Kjersgaard og Michael Ehrenreich, viðgera amerikanska forsetavalið í Norðurlandahúsinum.
- Hvør verður næsti forsetin í USA?
- Hvat verður avgerandi fyri valúrslitið?
- Hvør er Mitt Romney?
- Hvat hevur eyðkent fyrsta valskeiðið hjá Barack Obama?
- Hvørjar avleiðingar fær valúrslitið fyri restina av heiminum?
- Og hvussu er amerikanska valskipanin í roynd og veru skrúvað saman?
Sunnudagin 21. oktober fara tveir av fremstu serfrøðingunum í danska kongaríkinum, kendi sjónvarpsverturin Clement Kjersgaard og royndi korrespondenturin Michael Ehrenreich, at viðgera amerikanska forsetavalið, sum verður tann 6. november. Frá ymsum sjónarhornum fara hesir báðir USA-kennarar at viðgera ymsu tættirnar í valdystinum og ikki minst, hvat tað merkir fyri USA og restina av heiminum, hvørt heimsins superveldi fær ein nýggjan forseta ella ikki.
Clement Kjersgaard (f. 1975) er sjónvarpsvertur á DR, redaktørur, blaðútgevari og ein av mest eftirspurdu fyrilestrahaldarum í Danmark. Í 2011 varð hann kosin valdsmiklasti journalisturin í Danmark av danska fakblaðnum Journalisten og hevur fingið fleiri virðislønir, m.a. Publicistprisen og Årets aktualitetsprogram (fyri kjaksendingina Debatten) í 2011. Í 2007 gjørdi hann sendingina Clement í Amerika, sum snúði seg um amerikanskan politikk undan forsetavalinum í 2008. Hann hevur eisini útgivið bøkurnar "USA - Europa" (2003) og "Bushs Amerika" (2005).
Michael Ehrenreich (f. 1954) er fyrrverandi USA-korrespondentur fyri Berlingske Tidende og núverandi redaktørur og uttanríkispolitiskur viðmerkjari á Kristeligt Dagblad. Í 2007 skrivaði og útgav hann bók um Hillary Clinton (Hillary en amerikansk historie). Hann hevur eisini verið korrespondentur í London og reportari á Christiansborg og er javnan viðmerkjari og fyrilestrahaldari um uttanríkispolitisk viðurskifti. Formaður í donsku deildini í IPI (International Press Institute).
Tiltakið er fyri øll, sum hava áhuga og sum burdu havt áhuga fyri heimsins størstu politisku hending!
