»Samráðingar verða við donsku stjórnina um at dagføra ríkisveitingina til dagsvirði. Av hesum og komandi árligu økingini av ríkisveitingini verða 15% av vanligu meirinntøkum landskassans mótroknaðar í økingini.«
Av tí at 15 prosent av mettu meirinntøkum landskassans er meira enn tær 8,6 milliónirnar, sum prístalsviðgerðin av blokkinum gevur, átti blokkstuðulin als ikki at hækka yvirhøvur. Men tað hevði uttan iva verið meira, enn løgmaður og Sambandsflokkurin høvdu kunna livað við – tað hevði gjørt blokkstuðulsskommina fullkomna eftir sera laka úrslitið, sum Sambandsflokkurin fekk burtur úr samráðingunum hjá landsstýrinum við donsku stjórnina.
Tað eru viðurskifti í politikki, sum eru forútsigilig. Eins forútsigiligt, sum tað var, at Jákup Mikkelsen ikki fór at fáa langa tíð í fiskimálaráðnum, var tað, at ætlanin hjá Sambandsflokkinum við at hækka blokkstuðulin við 200 milliónum krónum ikki fór at bera á mál. Hetta vistu fólk, og hetta vistu samstarvsflokkarnir hjá Sambandsflokkinum eisini. Tí var tað ikki so løgið kortini, at Fólkaflokkurin, sum stjórnaði fullveldislandsstýrinum, sum lækkaði blokkin á sinni, nú brádliga góðtók at blokkstuðulin skal hækka aftur. Soleiðis er politikkur, tað snýr seg um at handla.
Fólkaflokkurin kundi misssa andlit – í øllum førum partvís – við at skriva undir eitt samgonguskjal, sum hevur til endamáls at hækka ríkisstuðulin.
Soleiðis ber til í politikki at lumpa sínar samstarvsflokkar. Ikki tí at Fólkaflokkurin hevur verið óreiðiligur mótvegis Sambandsflokkinum. Tvørturímóti er tað Sambandsflokkurin sum hevur verið bláoygdur – so bláoygdur, at hann trúði, at Fólkatingið og ríkisstjórnin fóru at góðtaka at hækka blokkin aftur, sum løgtingið lækkaði av sínum eintingum fyri 10 árum síðani. Sambandsflokkurin trúði eisini, at Fólkaflokkurin av heilum hjarta tók undir við hesi bláoygdu ætlan.
Men Fólkaflokkurin vann flatskattin, sum varð skundaður ígjøgnum, uttan at løgmaður fór í útlegd at hugsa seg um. Nú standa stórar politiskar avgerðir fyri framman á fiskivinnuøkinum – har Fólkaflokkurin og Sambandsflokkurin ikki eru samdir. So er spurningurin, um løgmaður og hini í Sambandsflokkinum verða bláoygd ella árvakin...?
