At stríðast um smálutir duga føroyingar væl – og skriftmálið hevur mangan verið kastibløka.
Vit eiga koritni at vera fegin um, at vit hava havt so nógv fólk – og framvegis hava – sum hava gjørt eitt stórt arbeiði fyri at verja og menna mál okkara. At vit eru ósamd er ikki ein ódygd í sjálvum sær. Tí hevði eingin slóðað fyri, so hevði móðurmálið hjá okkum langt síðani verið farið fyri bakka. At málið er varðveitt, og skriftmálið endurskapt, er eitt bragd, sum slóðarar hava staðið fyri, og sum vit eiga at vera stolt av sum fólk og tjóð og takksom fyri.
Men stríðið um stavraðið kann tykjast eitt sindur neyðarsligt. Ilt er at síggja haldgóðar grundgevingar fyri ikki at hava »fremmandu stavirnar«, sum kortini ikki eru okkum so fremmandir, við í stavraðnum. Tí hóast teir ikki verða nýttir í føroyska skriftmálinum, so verða teir nýttir nógv í Føroyum.
Er tað eitt politiskt stríð hjá ávísum bólkum at halda teir úti, tí teir eisini eru danskir, so vísir tað meira á fáfongd enn vit og skil.
Vit hava sjálvsagt brúk fyri at duga stavraðið, eisini við hesum fimm óynsktu stavunum, um vit skulu nýta orðabók, leitorðalista í yrkisbók, navnalista í telefonbók og so framveigs. Tá er eisini neyðugt at duga stavraðið uttanat, eitt stavrað, sum kann nýtast til allar í okkara samfelag vanligar orðalistar, eisini t. d. enska orðabók.
Tí man tað vera longst sum best, at vit hava eitt føroyskt-vesturlendskt stavrað.
Ein kendur føroysktlærari í Havn, bæði á Venjingarskúlanum og á Læraraskúlanum var Jeffrei Henriksen. Hann plagdi at siga, at vit skulu nýta føroyskt-vesturlendskt stavrað, sum er tað føroyska saman við x, y, z, w og q. Hann lærdi børnini tað uttanat við at syngja tað við lagnum til »Vilt tú, vilt tú«:
A Á B C D Ð E F G H I Í J K L M N
O Ó P Q R S T U Ú V W X Y Ý Z Æ Ø
Hann helt eisini, at danska »å« og íslendska »Þ« kundu setast aftast eftir tørvi.
Kanska málnevndarlimirnir áttu at lurtað eftir gomlum og royndum lærarum, sum Jeffrei Henriksen. Tí við ella uttan vilja málnevndarinnar: Hesir fimm stavirnir hvørva ikki úr føroyskum gerandismáli kortini.
