Atlantsflog er ikki hissini felag. Hetta er portrið hjá okkum út í heim – portrið, sum hevur so stóran týdning fyri samfelagið alt. Bæði tá tosað verður um fólkaflyting og fólkavøksturin, so hevur Atlantsflog ein grundleggjandi týdning.
Orsøkin sigst vera, at »strategiin skal broytast«. Sagt verður eisini, at einki er galið við frákoyrda stjóranum, sum nevndarformaðurin beinleiðis hevur takkað alment.
Men hvør er hendan kósin, sum skal rættast inn? Hvat er tað, sum fyrrverandi stjórin ikki hevur megnað at fáa upp á pláss, sum ein nýggjur stjóri – sum er funnin í eini handavend – skal megna?
Tað kunnu sjálvsagt verða viðurskifti, sum krevja broytingar og viðurskifti, sum ikki tola dagsins ljós. Men strategiin hjá okkara tjóðarflogfelag átti ikki at verið duld ella loynilig. Hana áttu vit øll at kent.
Tað er eisini sera ørkymlandi, at landsstýrismaðurin sigur seg einki vita um hetta. Tað er einki dulsmál, at Johan Dahl, landsstýrismaður, mangan hevur verið kritiskur yvir fyri leiðsluni í Atlantsflog. Hann hevur eisini hótt við at tjóðartaka privata partapeningin í felagnum. Sum størsti partaeigari hevði tað onkustaðni verið ábyrgdarleyst, um hann sat uttan ávirkan í einum slíkum máli!
Tveir føroyingar, ein svii og ein dani sita í nevndini í Atlantsflog – eins og tvey umboð fyri starvsfólkið.
Ein avgerð um at koyra stjóran verður valla tikin uttan samtykki frá høvuðspartaeigaranum, alias Johan Dahl. Um talan er um kravboð úr Tinganesi, ella ikki, kemur neyvan fyri ein dag. Er tað so, at strategiin fyri felagið skal broytast so grundleggjandi, so hendir tað valla heldur, uttan at høvuðspartaeigarin hevur ein fingur við í spælinum.
Hóast vit spyrja, so fáa vit einki svar. Men staðfestast kann, at Atlantsflog og nýggja kósin hjá felagnum hevur stóran týdning fyri okkum øll. Tí tjóðarflogfelag okkara er høvuðsdyrnar út í heim – tí hava allar avgerðir um Atlantsflog so stóran týding fyri allar føroyingar og fyri framtíðina hjá Føroyum.
