Hesum boðaði Karsten Hansen, landsstýrismaður í heilsumálum frá her í blaðnum mánadagin.
Og vit kunnu ikki annað enn geva landsstýrismanninum rætt í mótsøgnini, sum er í at geva summum úrvaldum møguleikan at keypa tollfrítt tubbakk, samstundis sum onnur noyðast at rinda fullan prís. Og ja, tað er at gera mun á fólki, og tað er skeivt.
Tað er eisini politiskt ókorrekt yvirhøvur at hava slíkar avoldaðar skipanir við tollfríari sølu av tubbakki og rúsdrekka – sum ES londini langt síðani hava útruddað.
Visjónin hjá Fólkaheilsuráðnum er, at Føroya skulu vera roykfríar um nøkur ár. Hetta er ein bærilig ætlan, sum krevur nógv av teimum, sum hava ábyrgdina fyri uppvaksandi ættarliðnum. Tí tað er har, skaðin skal bøtast.
Fólkaheilsuráðið hevur fyrr sagt, at tey sum eru fødd aftan á 2000 skulu ongantíð byrja at roykja.
Tað er so eitt mál, sum foreldur hjá hesum børnum kunnu tryggja, at tað fer at eydnast. Tí megna foreldur ikki at leggja tað niður í síni børn, so er støðan vónleys. Men velja foreldur at hesum børnum at síggja millum fingrarnar, um tey byrja at roykja, so fer at at minna ikki sørt um vanrøkt av børnum.
Men nógv gongur rætta vegin viðvíkjandi royking. Roykurin er fingin út úr almennum hølum, og á arbeiðsplássum ber til at fáa sær tubbaksfríar matarsteðgir. Á matstovum nýtist tær ikki longur at bíða eftir plássi, til tey eru liðug at roykja, og í dansi- og samkomuhølum er roykfrítt.
Gongdin er tann rætta – og tað man fara at síggjast aftur í heilsuhagtølunum.
So Karsten Hansen, drív tú endiliga á við at fremja roykitálmandi tilmælini frá Fólkaheilsuráðnum um eitt nú at herða ásetingarnar fyri sølu av tubbakki til ung undir 18 ár, um at hækka prísin á tubbakki, um at skerpa reglar um at roykja, tá tú ert saman við børnum og so framvvegis.
Visjónin um einar roykifríar Føroyar kann væl eydnast – og eingin saknur verður í tubbakkinum...
