Annars var løgmansrøðan ikki so nógv øðrvísi enn løgmansrøður flest. Men nøkur mál eru, sum fara at elva til eitt heyst, sum verður merkt av politiskum stríði. Meðan stjórnarskipanaruppskotið tykist vera lagt til viks, so er løgmaður greiður í málinum um fiskidagarnar. Hann sigur, at árligi bardagin um fiskidagarnar skal halda uppat, at fiskastovnarnir skulu gagnnýtast á ein burðardyggan hátt. Hann leggur dent á síni sjónarmið við at siga, at vit ikki kunna liva við eini fiskidagaskipan, har politisk togtogan er avgerandi fyri talið á fiskidøgum heldur enn vísindalig tilmæli.
Hann sigur semju vera gjørda við Tjóðveldi og Framsókn um at umskipa fiskivinnuna, har endamálið er at gera eina nýggja skipan, sum skal koma í staðin fyri verandi skipan við loyvisrættindum, ið ganga út í 2018.
Annað mál er kommunureformurin – málið um nýggja kommunubygnað. Hetta málið hevur verið skundað ígjøgnum við stuttum hoyringsfreistum í summar, og er nú lagt fram á ting. Men málið hevur fingið sera drúgva viðgerð, um vit hugsa um tilgongdina, sum byrjaði tíðliga í nítiárunum. Tað tykir, sum løgmaður nú vil skera ígjøgnum, so nýggjur kommunubygnaður verður klárur til kommunuvalið næsta ár. Hetta er eisini ein reformur, sum fær stóran týdning, og sum full semja valla er um.
Av øðrum málum nevnir hann eitt nú, at tey trý sjúkrahúsini skulu leggjast undir eina leiðslu. Hetta plagar ikki at fara friðarliga aftur við borðinum -– tí bæði á Tvøroyri og serliga í Klaksvík plaga tey at leggja ring um sjúkrahúsið, sum bestemt ikki skal stýrast úr Havn.
So er tað pensjónsreformurin, sum eisini verður lagdur fram. Her tyktist ikki valda semja – men í løglistanum verður so víst til hesa semju, so løgmaður hevur helst mót uppá eisini at fáa hendan reformin ígjøgnum.
Um tað ber til at fáa allar hesar reformar ígjøgnum, tað fer bara tíðin at vísa.
Men løgmaður hevur fingið sær eitt gott alibi við at hótta við at skriva út val. Hetta kann vera tí, at hann leggur trýst á, men tað kann eisini vera tí, at hann ikki trýr upp á, at tað ber til at fáa hesar reformar ígjøgnum. So vit fáa uttan iva eitt lívligt heyst.
Og skulu vit gita, so skrivar hann út val í september ella oktober. So verður nýggj samgonga skipað, sum kann gera eina nýggja fíggjarlóg fyri næsta ár. Og tann samgongan tykist longu vera í pottinum – verandi samgonga saman við Tjóðveldinum og Framsókn.
