Tjóðveldi var stóri taparin. Fullveldisætlanin tykist endaliga jarðað, nú Tjóðveldi varð bumbað aftur um tíðina við Høgna Hoydal og fullveldinum, sum byrjaði á valinum í 1998.
Men eitt tað mest merkisverda úrslitið var hjá Javnaðarflokkinum. Eitt er, at flokkurin fekk tað ringasta valúrslitið í áttati ár ? síðani annað valið hjá flokkinum í 1932, tá flokkurin fekk 10,5 prosent. Við undantaki av katastrofuvalinum í 1994, so hevur Javnaðarflokkurin ikki verið so illa fyri í 80 ár.
Men tað er kanska ikki at lasta nýggju leiðslu floksins, sum hevur bjargað tí mesta av tí tapta innaftur, um hugt verður eftir veljarakanningunum síðani síðsta val.
Men nakað annað er, at Aksel V. Johnannesen fær sína sak fyri við nýggju manningini. Øll vita, at Gerhard Lognberg hevur ligið í støðugum stríði við floksleiðsluna. Henrik Old hevur beinleiðis arbeitt ímóti leiðsluni og flokkinum í valstríðnum, og Kristin Michelsen á Tvøroyri er ikki júst kendur fyri at vera serliga komprissøkjandi.
Javnaðarflokkurin hevur mist profilar sum Hans Paula Strøm, Helenu Dam á Neystabø og John Johannessen, og hann hevur fingið menn, sum longu hava boðað frá, at teir ikki ætla at arbeiða í takt við flokkin.
Og tað er als ikki álitisvekjandi, at tveir av tingmonunum beinleiðis stungu formannin í ryggin í útvarpinum í gjár. Henrik Old tosaði um katastrofuna við fiskivinnupolitikkinum, og segði, at hann ikki var sloppin upp í part í valstríðnum, tí tað ikki passaði inn í systemið hjá leiðsluni.
Gerhard Lognberg segði eisini við útvarpið, at hann ikki var sloppin fram at, tí hann ikki aktaði leiðsluna. Hann segði, at hann varð hildin uttanfyri.
Kristin Michelsen hevur boðað frá, at hann fer fyrst og fremst á ting fyri atbeiða fyri Suðuroynna, og setti sum ófrávíkiliga treyt fyri at fara í samgongu, at Hvalbiartunnilin skuldi verða tann fyrsti og at sjúkrahúsið ikki skal undir felags leiðislu.
Alt hetta vísir ein flokk, sum ikki kann vera stjórnarberandi. Aksel Johannesen skal hava meira enn pedagogisk evni fyri at halda skil á slíkum vargum, og valla fer at bera til við nøkrum konstruktivum samstarvi – um tað so verður fyri tilfeingisgjaldi ella ímóti.
Fyrsta samdøgrið hjá nýggja Javnaðarflokkinum bendir tískil á split og ósemju, og við tí byggja tey valla land ella flokk.
