So andbráður boðaði býráðslimurin hjá Fólkaflokkinum frá, at um Fólkaflokkurin fekk borgarstjórasessin í Havn, so skuldi annað skil koma á. So skuldi skil fáast á fíggjarstýringini í býnum eftir vanstýringina hjá Heðini Mortensen – og so skuldi skattaprosentið lækka upp til 4 prosent.
Vallyftið Fólkafloksins til býráðsvalið í Havn stóð klokkuklárt og blomstraði á ymsu portalunum, sum enntá tóku pengar fyri bera slíkan boðskap út til allar føroyingar – og á Facebook.
Men nú fíggjarætlanin hjá høvuðsstaðnum var greidd til samtykar var einki uppskot frá Fólkaflokkinum um skattalætta.
Politikarar eru herligir og lova so mangt – bara teir fáa valdið. Fólkið er býtt og fólkið gloymir. Tað vita royndir politikarar. Tí ber til at siga eitt og gera annað. Soleiðis sum Fólkaflokkurin gjørdi við hesum setninginum hjá Boga Andreasen:
»Tá av trornar skal ein neyvari fíggjarstýring hava við sær skattalætta – møguliga eini 2-4 prosent – sum munar væl í pengapunginum hjá tí einstaka«.
Altso vel Fólkaflokkin og fá 4 prosent í skattalætta! Og tað passar, at ein skattalætti upp á 4 prosent merkist. Fyri ein arbeiðsmann ella arbeiðskvinnu merkir tað ein lítlan túsundkrónuseðil um mánaðin í skattalætta. Tað eru einar 11.000 krónur um árið ella 44.000 krónur eitt valskeið. Fyri ríku læknarnar og stjóraranar, sum vit høvdu í blaðnum mánadagin, merkir tað upp í 12.000 kr um mánaðin. Ella 144.000 kr um árið.
Men Fólkaflokkurin í Havn vil slett ikki geva borgarum í Havn skattalætta. Tað gjørdu tey greitt, so skjótt Heðin Mortensen fekk knívin í ryggin og nýggj samgonga varð skipað.
Tað pínir eisini Fólkaflokkin í Havn – sum skilligt er, at Jørgen Niclasen turkar skattalættar frá landsstýrinum upp á búskapin hjá býráðnum í Havn.
Viðhvørt ivast vit í, um tað er veljarin ella politikarin, sum er býttur. Politikarin er snildur, veljarin er býttur. Tað prógvar hann hvørja ferð hann hoppar upp á tollut vallyfti.
