Tað er bara tað, at tá ein leiðandi politikari førir seg soleiðis fram, so kann verða ringt at skilja ímillum, nær hann er hvat. Tí er hann trupul at taka fyri fult.
Undir tingviðgerðini av málinum hjá Javnaðarflokkinum og Tjóðveldinum um kringvarpsgjaldið hósdagin førdi hann fram, at ein almennur stovnur eigur í Sosialinum, sum hann ikki heldur vera ein óheftan miðil.
Vit undrast á, hví ein leiðandi politikari í Fólkaflokkinum – ein sum eisini førir seg fram sum vinnulívsmann – er so illa kunnaður um føroyskt vinnulív, at hann ikki veit betur.
Men hetta var helst ætlað sum eitt skot – hetta var uttan iva ein tilvitað roynd at skala trúvirðið hjá Miðlahúsinum.
Sum kunnugt átti Føroya Tele einaferð 34 prosent av partapeninginum. Føroya Tele gjørdist eigari stutt eftir, at P/F Miðlafelagið, sum starvsfólk á Sosialinum eiga, hevði keypt blaðið frá Javnaðarflokkinum. Hetta var 2006. Men longu árið eftir keypti P/F Miðlafelagið aftur partapeningin hjá Føroya Tele.
Soleiðis eru eingi handilslig ella politiskt áhugamál aftan fyri P/F Miðlafelagið, sum eigur Sosialin og Rás2.
– Eitt feikt úttalisli, sum ikki sømir seg formanni Fólkafloksins á tingi, halda vit!
