Politistøðin í Havn verður umvæld í vár, sigur danski løgmálaráðharrin, Brian Mikkelsen Eftir at ein grein í Sosialinum avdúkaði út av lagi vánaliga standin á politistøðini í Havn, setti Høgni Hoydal, fólkatingslimur, herfyri danska løgmálaráðharranum, Brian Mikkelsen, ein fyrispurning um viðurskiftini á politistøðini.
Føroyski fólkatingslimurin spurdi ráðharran, hvørjar viðmerkingar hann hevur til greinina, sum stóð at lesa í Sosialinum tann 31. oktober 2008. Har varð víst á, at bygningurin er gamal og í sera ringum standi.
Eisini fanst formaðurin í føroyska politistafelagnum, Jan Poulsen, í greinini hvassliga at hølisviðurskiftunum á politistøðini.
Í fyrispurninginum heitti Høgni Hoydal á danska ráðharran um at fáa viðurskiftini í rættlag sum skjótast.
Í svarinum, sum nú er komið frá ráðharranum, vísir hann til Ríkispolitiið, sum hevur greitt frá, at ætlanin er fremja umfatandi umvælingar av bygninginum sum skjótast.
Eitt nú verða vindeyguni skift fyrst í 2009, og síðani verður bygningurin sandblástur og málaður til várs.
Harumframt verða høvuðsdyrnar settar í stand, sigur danski løgmálaráðharrin, Brian Mikkelsen, sum hevur føroysku løgregluna undir sær.
