Postverk Føroya hevði eitt hall á 2,5 milliónir krónur í 2008. Trýst er framvegis á inntøkunum, og tí má sparast í 2009 og 2010 stendur í ársfrágreiðingini Hallið á 2,5 milliónir krónur í 2008 er 280.000 krónur størri enn í 2007, tá ársúrslitið var góðar 2,2 milliónir krónur.
Hetta gongur fram av nýggjasta ársroknskapinum hjá Postverk Føroya, ið var lagdur fram í dag.
Útlitini fyri komandi ár eru samstundis eisini døpur - fyri starvsfólkini í øllum førum.
Í ársfrágreiðingini stendur, at felagið er trýst av minkandi brævanøgdum og herdari kappingarstøðu innan útbering og farm.
Harumframt er filatelimarknaðurin í støðugari
minking, eins og pakkavirksemið er darvað av truplu tollmannagongdunum.
Tilsamans væntast inntøkurnar framhaldandi at vera undir trýsti.
Samlaða kostnaðarstøðið skal tí minka í 2009 í mun til 2008, stendur í ársfrágreiðingini.
Minkingin í kostnaðarstøðinum verður við neyðugum sparitiltøkum, sum ætlanin er at fremja í 2009 og 2010.
Ætlanin er til dømis at tillaga upp- og afturlatingartíðirnar á posthúsunum til kurértænastuna.
Við hesum sparitiltøkum væntar Postverk Føroya at rakstrarúrslitið í 2009 verður betri enn í 2008.
Hóast hallið er nevndin bjartskygd um framtíðina.
Hon sigur, at búskapargongdin í samfelagnum í 2008 er ikki farin framvið felagnum, og at hóast fallandi umsetning í 2008 og at sáttmálalønirnar fóru upp, so hevur raksturin ikki verið so nógv merktur av hesum.
Endaliga úrslitið fyri árið 2008 bendir á, at felagið er á rættari kós. Hetta gevur okkum góðar vónir fyri komandi árini, sigur nevndin í ársfrágreiðingini.
