Ári og H71 sorlaðu StÍF

H71 vann 34-17 ímóti StÍF í kappingarársins fyrsta dysti, har Ári Dam var í stórformi.

Tað komu ikki nógv mál fyrstu løtuni, har StÍF ávaraði H71 við at leggja seg á odda 2-0 eftir fimm minuttum og 4-2 eftir 10 minuttum.

Gestirnir mundu taka ávaringina í álvara, tí málini gjørdust ikki nógv fleiri fyri heimaliðið.

Verjurnar báðar stóðu sterkast í myndini, og hóast StÍF eydnaðist við skjótálopum fyrstu løtuna, fór H71 at fáa glið á sítt álop – og málverjan hjá sær.

StÍF-málið skert – H71-málið væl mannað

StÍF var nakað skert í málinum, har Eli Gærdum ikki var við.

Í hansara stað gjørdi Pól Andreassen comeback, eins og ungi Markus E. Jacobsen royndi seg.

Hjá H71 var nýggi danski málverjin, Jacob Nitholl Thomsen á listanum, men tað var royndi Ári E. Dam, sum gjørdist ímyndin og avgerðin í fyrra hálvleiki.

Ári avgjørdi alt í fyrra hálvleiki

Tí at alt, sum verjan ikki steðgaði, tók Ári Dam sær av. H71 legði seg á odda 7-6, eftir at StÍF bert hevði fingið tvey mál í sjey minuttir. Tað gingu átta minuttir áðrenn næsta málið. Tá minkaði StÍF niður í 12-7 til H71.

Og Ári Dam helt fram í H71-málinum. StÍF slapp í fleiri skjótálop, men hóast púra fríar skjóttar, stóð H71-málverjin fyri hvørja ferð,

Hálvleiksstøðan gjørdist 16-7 til H71, og dysturin var longu avgjørdur.

Útiliðið skifti út á flestu plássum. Eisini í málinum, har Jacob N. Thomsen kom inn frá byrjan av seinna hálvleiki, og heldur ikki hann lat nógv mál inn.

Um tað var StÍF-álopið sum haltaði ella H71-verjan, sum var sterk, skal ikki sigast. Men tað skuldu ganga knappir fimm minuttir av seinna hálvleiki áðrenn StÍF fekk sítt áttanda mál.

Í hinum endanum gjørdist ilt verri hjá heimaliðnum, ið tók time-out eftir seks og ein hálvan minutt. Tá var støðan 21-8 til H71.

Spurningurin var bara hvussu nógv munurin fór at enda á, og H71 kundi fara av Skála við 34-17 sigri í viðførinum.

Burn menn

StÍF - H71 17-34

StÍF: Martin Danielsen 3, Jóannes Prestá 3, Bjarni í Selvindi 2 (1), Pætur Ó. Barclay 2, Búi Poulsen 2 (1), Tummas Simonsen 1, Pætur Johansen 1, Ivan Mrdalo 1, Eyðbjørn Arge 1, Dávid Danielsen 1.

H71: Hallur Biskopstø 7(4), Pætur Thomsen 7, Rói á Skipagøtu 4 (1), Bogi Hansen 3, Peter Krogh 3, Baldur Gillason 3, Niklas H. Hanusarson 2, Sveinur Olafsson 2, Bogi G. Davidsen 2, Sakir T. Frýdal 1.