Russland sendir nú upp sína fyrstu rúmdarrakett til Mánan síðan 1976. Hetta er rúmdarsonda við navninum, Luna-25.
Sambært russiska rúmdarfelagsskapinum, Roskosmos, er málið, at Russland verður fyrsta landið, sum fremur eina lending á suðurpólinum á Mánanum.
Reuters veit at siga, at Roskosmos vil vera við til at menna tøkni til eina "bleyta" lending á Mánanum, umfram at rúmdarfelagsskapurin vil leita eftir náttúruevnum á Mánanum.
Ferðin til Mánan fer væntandi at taka fimm dagar. Síðan fer rúmdarsondan at ferðast kring Mánan í 5-7 dagar, áðrenn hon ætlandi lendir.
Ætlanin er, at Luna-25 skal verða virkin í eitt ár.
Luna-25 verður skotin upp úr Vostotsjnyj, einar 5500 kilometrar eystanfyri russiska høvuðsstaðin, Moskva.
- Í samband við uppskjótingina eru íbúgvar í einari bygd, sum liggur nærindis, fluttir burtur, meðan uppskjótingin fer fram, veit Reuters at siga.
