U-18 genturnar hjá Føroyum, sum hesar seinastu dagarnar hava verið í Tallin í Estlandi og spælt menningarkapping móti Estlandi, Lettlandi og Litava, hava í dag spælt seinasta dystin á túrinum.
Dysturin var ímóti vertstjóðini Estlandi í einum dysti, sum føroysku kvinnurnar vunnu sannførandi 3-0.
Tórunn Joensen legði fyrst Føroyar á odda 1-0, tá hon sendi hornaspark beinleiðis í netið, og løtu seinni øktu Føroyar til 2-0, tá Estland gjørdi sjálvmál. Í seinna hálvleiki slerdi Rebekka Banbakoura sigurin fastan, tá hon skoraði til 3-0 til Føroyar, sum eisini varð endaliga úrslitið.
Venjarin hjá U-18 gentunum, John Petersen, sigur við heimasíðuna hjá FSF, at hann er væl nøgdur við kappingina.
- Samanumtikið ein góð kapping, við fýra rímuliga jøvnum liðum. Allar á liðnum fingu nógva spælitíð, og tað eru sovorðnar kappingar, ið gera, at okkara gentur kunnu mennast, sigur John Petersen, landsliðsvenjari.
Føroyski sigurin á Estlandi ger, at Føroyar enda á einum deildum 2. plássi í kappingini, meðan Litava vann við fullum stigatali. Føroyar, Estland og Lettland fingu 3 stig í part, men føroyska liðið verður nummar 2, við besta málmuninum.
