Lydia Laksafoss
1.683 praktiserandi serlæknar í Danmark
Fer ein inn á internetið og leitar á Krak.dk, so eru 1.683 praktiserandi serlæknar í Danmark, umframt teir serlæknar sum arbeiða á sjúkrahúsum.
Danir kunna eisini fara til onnur lond, til dømis Týskland, at fáa serviðgerð, um teir halda at bíðitíðin er ov long heima.
Í mesta lagi 2 mánaðars bíðitíð í Danmark
Fólkatingið hevur á vári 2002 lóggivið um frítt sjúkrahúsverk, har sjúklingur sum hevur bíðað yvir 2 mánaðar eftir viðgerð, hevur rætt til at blíva viðgjørdur á privatum sjúkrahúsi ella klinikk í Danmark, ella sjúkrahúsi uttanlands. Tað almenna skal gjalda fyri viðgerðina.
Teir kunna eisini fara beinleiðis til ymsar serlæknar t.d. til eygna- og oyrnalækna.
Bíðitíðin í Føroyum mangan yvir 1 ár
Her á landi hava vit onki val, tá ið talan er um serlæknaviðgerð. Vit hava bert ein serlækna til hvørt spesiali. Hesir eru ovbyrjaðir av arbeiði. Bíðitíðin er frá ½ ári um væl skal verða og hjá onkrum 1 ár og mangan uppaftur longur.
Avleiðingin ómenniskjaligt stress
Hetta er ikki nøktandi fyri sjúklingin. Henda bíðitíð og óvissa stressar sjúklingin ómenniskjaliga.
Hetta ávirkar eisini familjuna hjá sjúklinginum, tað verða alt ov nógvir sjúkradagar. Fyri arbeiðsplássið verður hetta ómetaliga dýrt.
Hvat um vit sluppu til serlækna í Danmark?
Flestu føroyingar ferðast fleiri ferðir um árið til Danmarkar. Hvat um vit høvdu ta avtalu, at vit kundu sloppið til serlækna í Danmark, um vit sjálvi vildu gjalda fyri ferðina, so varð tað bert rokningin frá serlæknanum, sum heilsuverkið skuldi gjalda, og hon er ikki størri, um serlæknin er dani.
Hvat um sjúklingurin sjálvur kundi valt, um hann vildi viðgerast av serlækna í Føroyum ella í Danmark.
Avleiðandi effektin av styttri bíðitíð vildi eisini spart sjúkradagpening og løn til alment sett undir sjúku.
Føroyska heilsuverkið er alt ov stirvið. Hvat um sjúklingurin bleiv settur í fyrstu røð?
Vit hava øll ábyrgd fyri okkara heilsu, men vit skulu eisini kunna vænta at fáa viðgerð frá heilsuverkinum, tá ið okkum er tørvur á tí.
Sambandsflokkurin vil arbeiða fyri hesum
Í stevnuskrá Sambandsfloksins stendur at viðgerðin ikki skal standa aftanfyri, tí sum fæst í hinum Norðanlondum, og er hetta eitt mál, sum Sambandsflokkurin arbeiðir fyri at loysa.
