Hóast veðrið ikki var av tí besta, so var at kalla fullsett í Mentanarhúsinum í Fuglafirði, har Frits Johannesen hevði sett upp áhugaverda skrá við seyðapráti.
– Onkur tók til, at kvøldið var so upplýsandi og áhugavert, at tað átti at verið bandað. Tá var Frits kvikur at svara, vit fara bara í Norðurlandahúsið við hesum sama tiltaki, siga tey úr Fuglafirði.
Magna Thomassen, lærari, dóttir Petrinu og Robert Joensen, fer at siga frá um faðir sín, sum m. a. skrivaði um seyð og seyðahald í Norðoyggjum. Kristin Poulsen, lærari, fer at siga frá seyðasøgum og seyðarakstri í Fuglafirði. Jákup Pauli Johannesen, arkitektur, hevur hugarák í samband við at hava seyð og søgur frá faðir sínum, Evaldi Johannesen. Petur Martin Petersen, kunningarstjóri, ber fram eitt seyðakvæði, sum hann hevur yrkt. Dávur Winther, mentanarleiðari, fer at siga frá seyðarakstri á Skarvanesi og eisini fer Niels Midjord at syngja: Fimm feitar flugur, sum ikki eru so vælkomnar í sambandi við seyðahald.
Vístar verða myndir við uppvørpu á veggin frá fjallgongu í Klemmuni, Gjógvará, Fjalli, Skarðhaga, á Góðadali, Rustini og ein lítil filmur verður eisini vístur. Hesum stendur Kjartan Madsen, fotografur, fyri.
Frits Johannesen hevur lagt kvøldsetuna, sum verður í Athøllini í Norðurlandahúsinum, til rættis. Kostnaðurin fyri tiltakið er fimmti krónur.
