Men meir enn hampuligar bar ikki til at siga, tí hóast salurin var bæði vakur og vælegnaður til sjónleik, so var tað bara ein salur. Uttan stólar at sita á, og ljós, so til ber at síggja leikararnar, er ringt at kalla tað eitt rættiligt leikhús.
Fíggjarligi karmurin hjá Grímu er, sum hjá allari list í Føroyum, trongur, og tí hava nógv góð listafólk, tónleikarar, yrkjarar, myndlistafólk, frásøgufólk, o.o. í hesum døgum ókeypis verið við at mynda nøkur hugnalig og fullsett kafé-kvøld í gamla meiaríi til frama fyri stólar og ljós til Grímu.
Men tað er ikki bara høli, ið Tórshavnar kommuna hevur lutað býarbørnum sínum. Hetta seinasta árið hevur kommunan rættiliga verið í ?spanderbrókunum?. Milliónirnar, sum hava rullað í ta nýggja fótboltsstadionið, Tórsvøll, hava næstan ongan enda tikið. Og har hevur onki verið óført. Alt samdøgrið hevur verið svart av fólki, sum hevur arbeitt at gera vøllin til, og her manglar so í hvussu so er ikki stólar.
Føroyskur fótboltur er, tað eg veit av, enn ikki professionellur, men hevur kortini longu eitt annað altjóða stadion at leika á, og annars eitt ótal av vallum stroyddar um alt landið. So hví føroyska landsliðið partú skuldi sleppa at tapa móti onkrum útlenskum liði í Havn heldur enn á Svangaskarið, tað vóni eg, at onkur skilur betri enn eg. Hvønn mun akkurát staðið gjørdi teimum báðum nevunum av áskoðarum, sum vóru til dystirnar, veit eg ikki, - ella ein mun gjørdi tað helst fleiri teirra, tá tey dagin eftir hoyrdu, at vøllurin var farin á flog...... (lukkutíð ikki tann parturin, sum er uppi yvir barnagarðinum í B36-húsinum!!).
Seinasta, eg hoyrdi um Tórsvøll, var, at kommunan nú hvørt ár setur av eina millión til rennibreyt kring vøllin, eina rennibreyt, sum vit allarhelst høvdu fingið nógv bíligari, varð hon gjørd av fyrstan tíð.
Nú eg tosi um, at Tórshavnar kommuna er so gávumild, so er vert at undirstrika, at kommunan jú er vit havnaborgarar, og at allir hasir pengarnir eru okkara skattakrónur. Tá nú so er, hvussu ber so til, at vit hava so lítið at siga í hesum avgerðum? Roknar tú prosentbýtið millum, hvussu nógv hava verið til dyst á Tórsvølli og hvussu nógv eru til sýningar á gamla meiaríi, so er tað ivaleyst væl meira fullsett á meiarínum. Og vóru vit spurd eftir, so kanska vit heldur vildu givið okkara skattakrónur til leikhús enn til leikvøll, av teirri heilt einføldu orsøk, at tann seinni er so øgiliga nógvar ferðir dýrari og bert kann nýtast fáar ferðir árliga, meðan leikhúsið, um fíggjarligar umstøður høvdu verið, kundi havt sýningar hvørt kvøld.
Og kanska um Býráðið nú skuldi seta eina millión eyka av til okkurt hvørt ár, so hvat um tað hevði verið til at bygt nýggjar barnagarðar, ella til eldrarøkt ella til mentanarligt virksemi? Høvdu vit so øll atkvøtt fyri rennibreytini? Men vit vera ikki spurd eftir meira enn 4. hvørt ár.........
Hvat er tað, sum fær allar hasar stóru smádreingirnar, (ja orsaka at eg sigi tað, men eg havi ikki hitt nakað konufólk, sum gongur so við lív og sál upp í Tórsvøll, sum ávísir harrar, - eru teir nevndir, so eru teir kendir), til at velja at pumpa allar milliónirnar vit (ikki) hava til yvirs í fótbólt? Er tað enn tann gamla umberingin, at tað er besti mátin at gera Føroyar kendar? Er tað so stórt at vera kendur, tí nakrir mans banka nakrar aðrar við einum bólti? Hevði tað álvaratos ikki verið ólíka stuttligari, um Føroyar vórðu kendar um heimin, tí vit uppfostraðu stórar sjónleikarar, myndlistafólk, tónleikarar, høvundar, o.o.; tí at vit, bara 45.000 sálir, lívgaðu so væl um okkara mál og mentan, at vit kláraðu at standa stinn, hóast tann anglosaksiska flóðaldan royndi at sveipa okkum av fótum. Hevði tað ikki verið stuttligari, um vit um 2-300 ár enn kundu tosa føroyskt við stoltleika og vísa á tey mentanarlig avrik forfedrarnir løgdu eftir seg, enn at vit kundu reypa um, at ?HB36 has beaten Sumba for the first time this season?........???
Ja, eg meini tað......
