Og tey eru farin at fyrireika seg. Onkur smávegis mótmæli, væntar landsstýrismaðurin í fiskivinnumálum sær, men hann væntar kortini ikki, at nógvar atfinningar vera móti Føroyum fyri at gera fiskivinnusáttmála við Russland.
Tað er ikki altíð so lætt at skilja tað, sum politikarar stinga út í kortið. Men er løgmaður eins bláoygdur, sum fiskimálaráðharrin, at hann heldur, at umheimurin ikki fer at finnast at okkum, tá vit – sum um einki var hent, fara til Russland at taka lógvatøk saman blóðdálkaðu hondunum hjá Putin, Lavrov og hinum mordarunum og kúgarunum, sum stýra brotsmannalandinum Russlandi?
Álvaratos, hvussu hugsa hasir menninir, sum stýra í landsstýrinum? Hevur kríggið í Ukraina einki upp á seg, meinar fiskimálaráðharrin enn, at »talan bara er um eina ósemju«. Hasir menninir, sum stýra Russlandi, og sum landsstýrið ætlar sær at gera nýggjan fiskiveiðusáttmála við, eru drápsmenn, sum ikki virða mannarættindi – og enntá ikki trúgva upp á Várharra men uttan iva hin grábeinta, sum teir drepa frá hond, ikki bara hermenn, men eisini kvinnur og børn. Slík vittuggi skulu vit ikki samstarva við. Føroyar eiga ikki at gera nakra avtalu við bølmennini í Russlandi. Tað áttu vit at verið ov góð til. Og at skjóta seg undir burðardyggan fiskiskap. Øll vita helst, at fiskiskapurin hjá russum í føroyskum sjógvi neyvan er burðardyggur, og at teir stjala nógv meira, enn teir hava rætt til. So spurningurin er, um hasin russarasáttmálin er nakað verdur fyri føroyska samfelagð, tá gjørt verður upp – eisini hvussu nógv hvør stjelur frá hvørjum.
Putin og Lavrov og hinir drápsmenninir kunnu bólkast saman við Hitler og Stalin og øðrum blóðdálkaðum brotsmonnum úr søguni. Vit skulu ikki handla við slík fólk!
Øll eiga at kvetta alt samstarv við Russland líka til landið tekur seg aftur úr Ukraina og Putin og drápsmenn hansara eru drignir til svars við altjóða dómstólar. Vit eiga ikki at vera svíkjararnir og stuðla og virða og heiðra hópdrápsmenn. Um menninir í landsstýrinum eru vinir Russlands, so eiga vit at fáa klókar kvinnur og aðrar menn at stýra í Føroyum!