Hesi »vísu« orð eru søgd av tingsins røðarapalli av harra Bill Justinussen, løgtingsmanni Miðfloksins. Hann heldur, at serliga sendingarnar hjá Jákup Magnussen eru tann reina skræpa, tí støðið er so lágt. Hansara sendingar eru niðurbrótandi og oyðileggjandi, heldur miðflokstingmaðurin.
Tá Rás2 spurdi hann týsdagin, um einki er gott, sum Kringvarpið sendir, so var tað tó tað.
– Tað er ikki BARA skræpa, sum Kringvarpið sendir, men serliga sendingar hjá Jákupi Magnussen, Fólksins Rødd og ungdómssendingarnar, segði hann.
Tingmaðurin heldur, at har er so nógv lættisoppatilfar, fólk brúka so ljótan munn, tikið verður ímóti øllum tíðarráki uttanífrá, sum er niðurbrótandi fyri føroyska mentan og alt tað góða, sum Kringvarpið annars hevur bygt upp.
Bill Justinussen ber saman fíggjarætlanina hjá Kringvarpinum upp á 60 milliónir og so ta lítlu upphæddina, sum Rás2 verður rikin fyri.
– Rás2 hevur bara ein tíggjundapart av tí, sum Kringvarpið hevur, men tann munurin sæst ikki aftur í tilfarinum, ið sent verður, heldur Bill Justinussen.
Hetta eru hørð orð av einum tingmanni at nýta um navngivin starvsfólk í Kringvarpinum, at skíra alt hansara avrik fyri skræpu! »Skræpa« merkir sambært orðabókini »tunt skarn«, ella »leyst lív«. Tá heldur hann ikki lítið um seg sjálvan. Hetta má vera eitt mál, ið fakfelagið, Føroysk Miðlafólk, tekur upp.
Vit kunnu so bara staðfesta, at gott er, at øll ikki eru sum Bill – og fegnast um, at fólk eisini eru sum til dømis Jákup Magnussen, tí tá fáa vit eitt litfagrari samfelag.
Spennandi verður at hoyra »skræpu-panelið« (altso sambært Bill) hjá Jákupi Magnussen fríggjadagin klokkan 17...
