Fyrrapartin hevur eitt ógvusligt skriðjulop - ella skalvalop - verið Undir Brúnni í Klaksvík.
Sambært vaktleiðaranum á løgreglustøðini í Havn hevur lopið rakt eini fýra hús og onkran bil.
Tíbetur er eingin stórvegis fólkaskaði.
- Ein persónur lá undir, tá skriðan kom oman. Hann fekst leysur og varð fluttur á sjúkrahús til kanningar.
Vaktleiðarin sigur, at onkur bilur er eisini endaður undir skriðjulopinum.
Í løtuni er ikki greitt, um neyðugt verður at flyta fólk í nærmastu húsunum burtur.
- Tað fer tilbúgvingarleiðarin hjá Klaksvíkar Sløkkiliði at meta um og taka støðu til, sigur vaktleiðarin.
Dagføring 1:
Tað seinasta nýggja úr Klaksvík er, at fólk verða flutt úr øllum teimum ovastu húsunum Undir Brúnni.
Men, vandin fyri fleiri skriðjulopum í Klaksvík er eftir øllum at døma meira umfatandi í løtuni enn so.
- Tí verða fólk, sum búgva í ovastu húsunum bæði undir Klakkinum og Kjølinum biðin um at fara úr húsum sínum.
Dagføring 2:
Tað seinasta nýggja úr Klaksvík er, at kommunan heitir á øll fólk, sum búgva á ovastu rekkjunum í Klaksvík, Ánunum og á Norðoyri, um at fara frá húsum.
Soleiðis, sum In.fo skilir støðuna í løtuni, verða fólk, sum ongastaðni hava at fara, í fyrsta lagi víst til Badmintonhøllina og KÍ-høllina í Klaksvík.
