– Teir eru stórir og sterkir. Eru ótrúliga væl fyri kropsliga og eru vanir við at spæla í League One og League Two í Onglandi. Onkur hevur enntá royndir frá Premier League, sigur Bill M. Jacobsen, sum er U21 landsliðsenjari saman við Heðini Askham.
Tað er heldur ikki uttan orsøk, at U21 landsliðsvenjarin er varin, tá hann tosar um írska U21 landsliðið. Teir hava spælt tríggjar venjingardystir í ár. Allar hava verið móti stórum fótbóltstjóðum og úrslitini hava verið á góðari leið.
6. feburar vunnu teir ikki minni enn 3-0 á Hollandi. Í mars mánaði spældu teir móti Portugal og taptu 2-1. Seinasti venjingardysturin var móti Danmark. Hann endaði við javnleiki 0-0.
Ein av stjørnunum á írska U21 landsliðnum er Shane Duffy, sum hevur spælt fimm dystir fyri Everton í ensku Premier League.
Ikki færri enn tríggir av teimum eru sáttmálabundnir í Aston Villa, meðan onnur feløg, ið eru umboðaði í írska hópinum eru QPR, Watford, Birmingham, Wolverhampton og Blackburn.
Vit kunnu tí vænta okkum týpiskan bretskan fótbólt frá íska U21-landsliðnum. Tað er við høgari ferð, nógvum longum bóltum og nógvum nærdystum.
Onkir troyttir spælarar
Føroyski U21-landsliðshópurin líkist nógv tí sum var úttikin seinast. Kristian Joensen er aftur í málinum og spælir væntandi ein fullan dyst. Í verjuni eru Bárður Hansen, Rene Joensen, Hørður Askham og Sonni Ragnar Nattestad allir við.
Faktist eru allir ellivu, sum byrjaðu inni móti Rumenia í flott 2-2 javnleikinum á Toftum fyrr í ár, við aftur hesaferð.
Tí kundi verið líkt, at uppstillingin kemur at líkjast nógv tí, sum hon gjørdi tann dagin.
Munurin er tó, at fleiri av okkara spælarum hava spælt nógvar dystir í seinastuni. Summir hava spælt bæði í steypakappingini og í Evropa.
– Vit spæla við øllum tí sum vit orka í fyrra hálvleiki, men so hava vit eyguni við teimum, sum hava spælt nógv í summar. Helst koma útskiftingarnar at verða ávirkaðar av tí, sigur Bill M. Jacobsen.
